علم و عمل کا روشن باب حضرت امام موسیٰ کاظمؒ

سید صفدر حسین

امام موسیٰ کاظمؒ، حضرت امام جعفر صادقؒ کے صاحبزادے ہیں۔ آپ کی والدہ ماجدہ حمیدہ بربریہ اندلسیہ تھیں۔ آپ کی پیدائش ماہِ صفر ۱۲۸ھ میں مکہ معظمہ و مدینہ منورہ کے درمیان ایک مقام ابواء میں ہوئی اور وفات مشہور عباسی خلیفہ ہارون رشید کے عہد خلافت میں بروز جمعہ ۵؍ رجب ۱۸۳ھ کو ہوئی۔ کہا جاتا ہے خلیفہ ہارون رشید نے آپ کو بغداد بلایا اور پھر شک کی بناء پر آپ کو بغداد کے مضافات میں نظر بند کر دیا جو بعد میں کاظمین شریفین کہلانے لگا۔ یہ بھی روایت ہے کہ ہارون رشید کی ایماء سے آپ کو زہر دیا گیا اور آپ کی شہادت واقع ہوئی۔

آپ نے اپنے والد بزرگوار کی جانشینی کے فرائض بہ کمال و حسن و خوبی انجام دیئے اور اپنے والد محترم امام جعفر صادقؒ کی خدمت میں رہ کر طریقت کی منزلیں طے کیں۔ امام موسیٰ کاظمؒ اپنے والد بزرگوار کی وفات کے بعد ۲۰ سال کی عمر میں مسند پر جلوہ افروز ہوئے۔ آپ خاموش طبع انسان تھے۔ اپنے اوقاتِ عزیز عبادت و ریاضت اور درود و ظائف میں بسر فرماتے۔مجلس میں جب تک کوئی سوال نہ کرتا، خاموش رہتے۔ داد و دہش وراثت میں ملی تھی۔ صبر و تحمل، ضبط و برداشت آپ کے اوصافِ حمیدہ تھے۔ غصے کو پی جانے کی صفت آپ میں غالب تھی۔ کاظم الغیظ غصے کو پی جانے والے تھے۔

اس لئے کاظم کے لقب سے ملقب ہوئے۔ ابن حجر مکی روایت کرتے ہیں کہ امام ابو حنیفہؒ جب مدینہ منورہ تشریف لائے تو حضرت امام جعفر صادقؒ کی خدمت میں حاضر ہوئے جو ہم عمر بھی تھے اور امام موصوف نے آپ سے کسب فیض بھی کیا۔ امام ابو حنیفہؒ تو شاگرد حضرت امام باقرؒ کے تھے، مگر آپ کے فرزند جلیل امام جعفر صادقؒ سے بھی ارشادات حاصل کئے۔ جب امام موصوف حضرت امام جعفر صادقؒ سے ملنے تشریف لائے تو اس وقت آپ موجود نہیں تھے اور آپ کے خورد سال فرزند امام موسیٰ کاظمؒ موجود تھے۔

امام ابو حنیفہؒ نے ان کی دل جمعی کی خاطر کچھ علمی سوالات کئے۔ خورد سال موسیٰ کاظمؒ نے نہایت شرح و بسط سے جوابات دیئے کہ امام ابو حنیفہؒ نے آپ کو گود میں اٹھا کر پیشانی چوم لی۔ امام موسیٰ کاظمؒ اپنے والد محترم کی وفات کے بعد صرف ۲۰ سال کی عمر میں مسند پر جلوہ افروز ہوئے۔ اپنے ہم عصر علماء و عرفاء میں افضل ترین تھے اور خاموش طبع تھے ۔اپنے اوقات عبادت و ریاضت میں گزارتے۔

مجلس میں جب تک کوئی سوال نہ کرتا، خاموش رہتے۔ غریبوں اور مسکینوں کی مدد فرماتے۔ عباسی خلیفہ منصور کے عہد میں آپ نے ۱۵۷ھ تک پُر سکون زندگی گزاری۔ منصور کے بعد اس کے بیٹے خلیفہ مہدی نے دشمنوں کے بھڑکانے پر ۱۶۴ھ میں شک کی بناء پر آپ کو قید کر دیا اور ایک سال تک آپ قید میں رہے۔ اس کے بعد آپ کو رہا کر دیا گیا۔

مہدی کی وفات کے بعد اس کے بیٹے خلیفہ ہارون رشید کو کچھ درباریوں اور بنو عباس کے افراد نے امام موصوف کے خلاف بد ظن کیا اور اپنے بزرگوں کی روایت کو برقرار رکھتے ہوئے اس نے بھی آپ کو گرفتارکر لیا۔ آپ نے اسی عالمِ اسیری میں ۱۸۳ھ میں داعی اجل کو لبیک کہا اور بغدادکے قریب کاظمین شریفین میں مدفون ہوئے