عیدالفطر کا دن

حضرت انس رضی اللہ عنہ کا بیان ہے کہ جناب رسول اللہ صلی اللہ علیہ وسلم نے ارشاد فرمایا: ’’جب شب قدر آتی ہے تو جبرئیل علیہ السلام فرشتوں کی ایک جماعت کے ساتھ آسمان سے زمین پر اترتے ہیں اور ہر اس شخص کیلئے خیر و عافیت اور بھلائی کی دعائیں کرتے ہیں جو اللہ تعالیٰ کے ذکر میں مشغول ہو۔ خواہ وہ حالت قیام میں ذکر الٰہی میں مشغول ہو یا بیٹھ کر، پھر جب عیدالفطر کا دن آتا ہے تو اللہ تعالیٰ فرشتوں کے درمیان اپنے روزہ دار بندوں پر و فخر مباہات کا اظہار کرتا ہے اور فرماتا ہے۔ ’’اے میرے فرشتو اس مزدور کا کیا بدلہ ہوسکتا ہے جس نے ایمان داری کے ساتھ اپنے کام کو انجام دیا ہو؟‘‘ فرشتے کہتے ہیں کہ اس کا بدلہ یہ ہے کہ اسے پورا پورا معاوضہ دیا جائے۔ اللہ تعالیٰ فرماتا ہے : ’’میرے بندوں اور بندیوں نے اپنے اوپر عائد ہونے والے فریضے (روزے) انجام دیئے ہیں۔ پھر دعا کرنے کیلئے (آج باہر) نکلے ہیں۔ میری عزت و جلال، میرے کرم و بخشش، میری رفعت شان اور بلندی مقام کی قسم! میں ضرور ان کی دعائیں قبول کروں گا۔‘‘ پھر اللہ تعالیٰ اپنے بندوں سے مخاطب ہو کر فرماتا ہے ’’جائو واپس چلے جائو! میں نے تمہارے گناہ معاف کر دیئے اور تمہاری سیئات(برائیاں) کو حسنات (نیکیوں) میں بدل دیا۔‘‘ جناب رسول اللہ صلی اللہ علیہ وسلم نے فرمایا :’’پھر لوگ بخشے بخشائے واپس گھروں کو لوٹ جاتے ہیں۔‘‘

(شعب الایمان للبیہقی :حدیث37171:)