حیدرآبادی ہری مرچ سالن-Hydrabadi hari mirch salan

برصغیر پاک و ہند میں اختلافات چاہے کتنے ہی کیوں نہ ہوں لیکن ہمارے درمیان بہت سی باتیں اور چیزیں مشترکہ ہیں، اور اس میں سرفہرست ہے ہمارے کھانے جو تقریباً دونوں ممالک میں ایک جیسے ہی ہیں۔ اب جب کھانے کی بات ہو ہی رہی ہے تو اس میں ہم حیدرآبادی کھانوں کو کیسے بھول سکتے ہیں۔ حیدرآبادی کھانے نہایت ہی لذیذ اور مصالحے دار ہوتے ہیں جو لوگ بہت پسند کرتے ہیں، حیدر آبادی ہری مرچ سالن کی ترکیب جو کھانے میں مزیدار اور بنانے میں آسان ہے۔

اجزاء : 25 موٹی ہری مرچ، ایک چمچ زیرہ، ڈیڑھ چمچ ثابت دھنیا، ڈیڑھ چمچ مونگ پھلی، ڈیڑھ چمچ سفید تل، 3چمچ کُھرچا ہوا ناریل، 3 سے 4 پیاز کٹی ہوئی، 3 سے 4 چمچ املی کا گودا، ایک چمچ ہلدی، 15 کڑی پتے، ایک چمچ رائی، نمک حسبِ ذائقہ۔

ترکیب : تمام مصالحے (دھنیا، زیرہ وغیرہ) کو توے پر 2 منٹ بھون لیں، پھر اسے گرائنڈر میں پیس لیں، پھر اس خشک مصالحے کو جوسر بلینڈر میں ڈالیں اور تھوڑا سا پانی ڈال کر بلینڈ کریں اور مکسچر بنا کر سائیڈ پر رکھ دیں۔ پیاز کو بھی موٹے ٹکڑوں میں کاٹ کر الگ سے چاپر میں ہلکا بھربھرا سا پیس لیں، باریک پیسٹ نہیں بنانا ہے اس کا، اب ایک پین میں تیل ڈالیں اور اس میں کڑی پتے، زیرہ اور رائی ڈالیں۔ جب یہ کڑک ہوجائے تو اس میں ہری مرچ ڈال کر چند منٹ بھونیں اور پھر پلیٹ میں صرف ہری مرچ نکال لیں۔ اسی پین میں اب پیاز ڈال کر 4 سے 5 منٹ تک بھونیں اسے برائون مت کریں، پھر خشک مصالحوں سے بنا مکسچر، 1 چمچ ہلدی اور حسبِ ذائقہ نمک ڈال کر بھونیں۔ پھر تھوڑا سا پانی ڈال کر 15 سے 10 منٹ تک پکنے دیں۔ پھر اپنی ضرورت کے مطابق املی کا گودا شامل کریں۔ اس کے بعد ہری مرچ ڈالیں جسے ہم نے پہلے تلا تھا۔ تھوڑا سا پانی ڈال کر ہلکی آنچ پر 10 سے 12 منٹ تک پکنے دیں۔ شاندار، مزیدار اور مصالحے دار ہری مرچوں کا سالن تیار ہے