سرکاری نوکری میں دوسروں کا کام کرکے اضافی تنخواہ لینا

مولانا سیّد سلیمان یوسف بنوری

آپ کے مسائل اور اُن کا حل

سوال: میں ایک سرکاری ادارے میں کام کرتا ہوں اور میری تنخواہ 25000/- ہزار اور اسکیل 1 ہے اور میرا کام جہاز کی صفائی کرنا ہے، لیکن میری تعلیم اور تجربے کی وجہ سے ادارے کے افسران نے مجھے ایک اکاؤنٹ اور بلنگ کلرک کے کام پر لگایا ہے، جس کا کم سے کم اسکیل 9 ہے اور تنخواہ 35000/- سے 40000/- ہزار ہوتی ہے۔ میرے ادارے کے افسران مجھے اوور ٹائم کی مد میں 10000 سے 11000 ہزار روپے دیتے ہیں جو اوور ٹائم میں کرتا نہیں لیکن میری تنخواہ اور اسکیل کم ہونے اور کام بڑے اسکیل کا کرنے کی وجہ سے مجھے دیا جاتا ہے۔ سوال یہ ہےکہ کیا میرا یہ پیسہ لینا جائز ہے ؟

جواب: اگر سرکاری ادارے کے افسران کو حکومت کی جانب سے یہ اختیار ہے کہ کم اسکیل والے ملازم سے زیادہ اسکیل والے ملازم کا کام لینے کی صورت میں اوور ٹائم کے نام سے اضافی رقم دینے کی اجازت ہے، اگرچہ وہ اوور ٹائم نہیں کرتا ہو تو افسران کے لئے حکومت کے کھاتے سے اضافی رقم دینا اور سائل کے لئے لینا جائز ہے اور اگر افسران حکومت کے کھاتے سے نہیں دیتے، بلکہ ذاتی رقم سے انتظام کرتے ہیں تو بھی سائل کے لیے وہ رقم لینا جائز ہوگا۔اگر افسران بالا کو اس طرح کا کوئی اختیار نہیں ہے تو دس ہزار روپے حکومت کے کھاتے سے اضافی دینا درست نہیں، البتہ سائل کے لیے اضافی کام کرنے کی صورت میں اضافی رقم لینا جائز ہوگا، اور اگر اضافی کام نہیں کرتا تو اضافی رقم لینا جائز نہیں ہوگا۔