پاکستان کے تناظر میں کورونا وائرس کے نتیجے میں فوت شدہ میت کے غسل اور جنازے کا مسئلہ

مفتی منیب الرحمٰن 

ہمیں سیدفخر شاہ ہمدانی کی معرفت جناب ڈاکٹر سید عدنان خورشید کا یہ آڈیو میسج وصول ہوا:جس شخص کا کرونا وائرس کے نتیجے میں انتقال ہوجائے ،فوت ہونے کے بعد نہ وہ کھانس سکتا ہے اور نہ وہ سانس لے سکتا ہے، لہٰذا اس کا وائرس اس کے پھیپھڑوں تک ہی محدود رہے گا اور کسی اور میں منتقل نہیں ہوگا، کیونکہ جراثیم کے منتقل ہونے کا سبب سانس لینا یا کھانسنا ہے، ماسوا اس کے کہ اس کے منہ یا ناک سے کوئی رطوبت خارج ہورہی ہویا اُس کے جسم پر پہلے سے کوئی خارج شدہ رطوبت موجود ہو،اس میں جرثومے کا پایا جانا ممکن ہے۔لہٰذا مسلم میت کو باقاعدہ احترام کے ساتھ غسل دیا جائے، ویسے بھی وہ حکمی طور پر شہید ہے،تین مرتبہ پانی بہانا مسنون ہے، لیکن ایک مرتبہ پانی بہانے سے بھی غسلِ میت کا فریضہ ادا ہوجائے گا۔

البتہ غسل دینے والا حفاظتی کِٹ پہنے ،ہاتھوں پر باقاعدہ ایسے دستانے ہوں، جن سے پانی سرایت نہ کرے، غسل کے پانی میں ڈیٹول یا جراثیم کش دوا بھی ملائی جاسکتی ہے۔ غرض اس طرح ایسی میت کوباقاعدہ غسل دیا جاسکتا ہے اور غسل سے لے کر جنازہ وتدفین تک کے تمام مراحل احترام کے ساتھ طے کیے جاسکتے ہیں۔ ڈاکٹرسید عدنان خورشید کی بیان کردہ صورت سمجھ میں آتی ہے، اگر کسی کی تحقیق اس کے برعکس ہے تو وہ ضرور مطلع کریں۔البتہ یہ جوکہاجارہا ہے کہ جنازے میں زیادہ لوگ شریک نہ ہوں، اس کا تعلق میت سے نہیں ہے، بلکہ جنازے میں شریک لوگوں کے باہمی سماجی رابطے سے ہے ۔