شفاعت کے متعلق اسلامی تعلیمات

کتاب و سنت کی روشنی میں

سوال : شفاعت کے متعلق اسلامی تعلیمات کیا ہیں؟

جواب : قرآن حکیم میں شفاعت کے متعلق جو کچھ بتلایا گیا ہے، اس کا خلاصہ یہ ہے : (1)شفاعت کا معاملہ پورے کا پورا اللہ تعالیٰ کے اپنے ہاتھ میں ہوگا اور جو کچھ بھی ہوگا وہ اس کی مرضی اور منشا کے تحت ہوگا (2) شفاعت کے لئے زبان صرف وہی کھول سکے گا جسے اللہ تعالیٰ نے اجازت دی ہوگی (3) شفاعت کرنے والا صرف اس شخص کے بارے میں شفاعت کرسکے گا جس کے لئے اسے اللہ تعالیٰ کی طرف سے اجازت مل چکی ہوگی (4) اس شفاعت میں وہ صرف ایسی ہی بات کہے گا جو ہر پہلو سے ٹھیک ہوگی۔ ان حدود کے اندر جو شفاعت ہوگی، اس کی نوعیت کا اندازہ لگانا مشکل نہیں بلکہ نیک بندے ایک قسم کی شہادت دیں گے کہ چونکہ تیرے فلاں فلاں بندوں نے قافلہ حق میں شریک ہوکر سخت تکالیف اور آزمائش کی گھڑیوں میں اور ہر حال میں تیرے احکام اور رضا جوئی کے لئے سعی و جہد کی، ان کو اپنے دامن رحمت و مغفرت میں لے لے۔ یہ شفاعت دراصل اللہ تعالیٰ کے ایک خاص ضابطۂ مغفرت کا نام ہے جو مغفرت کے عام قانون سے قدرے رعایتی ہے۔