ناپ تول میں کمی

کتاب و سنت کی روشنی میں

سوال:کیا اسلام نے کاروباری لوگوں کو اس بات کا پابند کیا ہے کہ وہ ناپ اور تول میں اپنے اوزان صحیح رکھیں اور کسی کو بھی کوئی نقصان نہ پہنچائیں؟

جواب:جی ہاں، قرآن حکیم میں اللہ رب العزت نے اپنے جلیل القدر پیغمبر حضرت شعیب علیہ السلام کے واقعات بڑی تفصیل سے بیان کئے ہیں۔ حضرت شعیب علیہ السلام، حضرت موسیٰ علیہ السلام کے خسر تھے اور ان کو جس قوم کی طرف بھیجا گیا تھا، وہ تجارت پیشہ لوگ تھے۔ انہوں نے حضرت شعیب علیہ السلام کی دعوت و تبلیغ کے جواب میں کہا تھا کہ محنت ہم کرتے ہیں، سرمایہ ہم نے لگایا ہے، ہم جیسے چاہیں کاروبار کریں، آپ کو اس میں دخل دینے کا کوئی حق نہیں۔ حضرت شعیب علیہ السلام ان لوگوں کو ناپ تول میں کمی نہ کرنے کی ہدایت کرتے تھے، ناجائز منافع لینے سے روکتے تھے، اشیا میں ملاوٹ کرنے سے روکتے تھے، دھوکا اور فریب دینے سے اجتناب کرنے کی تلقین کرتے تھے، کاروبار میں لوٹ مار کرنے سے منع کرتے تھے۔ لوگوں کے ساتھ حسن سلوک سے پیش آنے کا حکم دیتے تھے، اس لئے ان کی قوم ان کے خلاف ہوگئی تھی، اللہ تعالیٰ نے اس قوم کو اپنے نبی کے احکام کی خلاف ورزی پر سخت سزا دی۔ حضرت شعیب علیہ السلام کے واقعات بارہویں پارے میں تفصیل سے بیان کرنے کے علاوہ تیسویں پارے کی سورۃ المطففین میں بھی اس سلسلے میں واضح احکام دیئے گئے ہیں۔