رمضان المبارک کی افطاری میں بنائیں لذیذ حلیم

رمضان المبارک میں افطار دسترخوان پر مختلف لذیذ پکوان پیش کیے جاتے ہیں، لیکن حلیم ایک ایسی ڈش ہے جو ذائقے اور غذائیت دونوں کے لحاظ سے خاص اہمیت رکھتی ہے۔

گندم، دالوں اور گوشت سے تیار ہونے والی حلیم نہ صرف بھرپور ذائقہ رکھتی ہے بلکہ روزہ کھولنے کے بعد توانائی بھی فراہم کرتی ہے۔ اگر آپ گھر پر آسان اور مزیدار حلیم بنانا چاہتے ہیں تو درج ذیل ترکیب پر عمل کریں۔

اجزاء:

گوشت(بون لیس) ایک کلو، پیاز ایک پاؤ، دھنیا(پسا ہوا) ایک چائے کا چمچ، گندم آدھا پاؤ، جو ¾ کپ (رات بھر پانی میں بھگو دیں) دال ماش آدھاپاؤ، دال چنا آدھا پاؤ، تیل ایک پاؤ، لہسن ادرک (پیسٹ) تین چائے کے چمچ، نمک چائے کے تین چمچ، دال مسور آدھا پاؤ، دال ارہر آدھا پاؤ، مرچ پاؤڈر تین چائے کے چمچ، زیرہ پاؤڈر ایک چائے کا چمچ، گرم مسالہ ایک چمچ ثابت، پسا گرم مسالہ ایک چمچ، ادرک جولین کٹ مٹھی بھر، لیموں، ہری مرچیں اور ہرا دھنیا گارنشنگ کے لیے۔

ترکیب:

گندم اور تمام دالوں کو دو گھنٹے بھگو لیں، جو اورگندم کو الگ ابال لیں، باقی دالیں الگ ابال کر خوب اچھی طرح گلا لیں۔ اب تیل میں پیاز فرائی کرلیں۔ فرائی کی ہوئی آدھی پیاز ایک طرف رکھ دیں۔ بقیہ پیاز میں لہسن اور تمام پسے ہوئے اور گرم مسالے ڈال کر گوشت بھی شامل کر دیں اور بھونیں۔

اب پانی ڈال کر گوشت کو گلنے تک پکائیں۔ اس کے بعد گوشت میں تمام دالیں اور گندم شامل کرلیں۔ پانی قدرے کم رہ جائے تو اچھی طرح گھوٹ لیں، یہاں تک کے تمام اشیاء یک جان ہو جائیں۔

اس حد تک گھونٹیں کہ گوشت کے ریشے دالوں میں مل جائیں اور چمچے سے اوپر اٹھانے پر ریشہ دالوں کے ساتھ آئے۔ باقی بچی ہوئی پیاز، پسا گرم مسالہ، لیموں، ادرک، اور ہری مرچ ڈال کر سرو کریں۔