آج افطار ڈنر میں بنائیں مزیدار چکن وائٹ قورمہ

رمضان المبارک میں افطار کے بعد ڈنر کے لیے اگر کوئی مزیدار اور خوشبودار ڈش بنائی جائے تو دسترخوان کی رونق دوبالا ہو جاتی ہے۔ عام قورمے کے مقابلے میں چکن وائٹ قورمہ ذائقے اور خوشبو کے اعتبار سے کچھ مختلف اور خاص ہوتا ہے۔

دہی، خوشبودار گرم مصالحوں اور کیوڑے کی مہک سے تیار ہونے والا یہ قورمہ نہ صرف لذیذ ہوتا ہے بلکہ افطار ڈنر کے لیے ایک بہترین انتخاب بھی ثابت ہوتا ہے۔ اگر آپ بھی آج اپنے گھر والوں کے لیے کچھ خاص بنانا چاہتے ہیں تو چکن وائٹ قورمہ ضرور آزمائیں۔

اجزاء۔

چکن۔ ایک عدد (بارہ حصوں میں کٹا ہوا)

دہی ۔دو کپ

پیاز ۔تین عدد (بڑی، کٹی ہوئی)

لہسن کا پیسٹ۔ ایک کھانے کا چمچ

ادرک کا پیسٹ۔ ایک کھانے کا چمچ

ثابت گرم مصالحہ۔ دو کھانے کے چمچ

کیوڑا۔ آٹھ کھانے کے چمچ

نمک۔ ایک چائے کا چمچ

ثابت لال مرچ ۔بیس عدد (گول)

ہلدی پاؤڈر۔ ایک تہائی چائے کا چمچ

ادرک۔ تین کھانے کے چمچ (باریک کٹی ہوئی)

آئل۔ ایک تہائی کپ

پانی۔ حسبِ ضرورت

ترکیب۔

گول لال مرچ کو کاٹ کر اس کے بیج نکالیں اور چھلکا کسی دوسرے استعمال کے لئے رکھ لیں پھر بیج کو باریک پیس لیں۔

اب تیل گرم کرکے پیاز فرائی کریں۔

گولڈن براؤن ہونے پر پیاز نکال کر نچوڑ لیں اور باریک پیس لیں۔

اس تیل میں ادرک اور لہسن دو منٹ تک فرائی کریں۔

پھر مرغی ڈال کر تیز آنچ پر دس منٹ تک بھونیں۔

اس کے بعد ثابت گرم مصالحہ ڈال کر دو منٹ تک بھونیں۔

اب نمک، مرچوں کے پسے ہوئے بیج، ہلدی اور پانچ کپ پانی شامل کرکے اُبال آنے پر ڈھکن رکھ کر دھیمی آنچ پر بیس منٹ تک پکائیں۔

ڈھکن ہٹا کر پھینٹا ہوا دہی شامل کردیں اور تیز آنچ پر پانچ منٹ تک پکائیں۔

اب پسی ہوئی پیاز اور کیوڑا شامل کرکے مزید دس منٹ تک پکا کر اتار لیں۔

اوپر سے باریک کٹی ہوئی ادرک ڈال کر پیش کریں۔