رمضان اسپیشل: ڈرائی چکن چلی وِد چائنیز رائس افطار کا لذیذ انتخاب

رمضان المبارک رحمتوں، برکتوں اور مغفرت کا مہینہ ہے۔ اس بابرکت مہینے میں افطار دسترخوان کی رونق بڑھانے کے لیے ہر گھر میں نت نئے اور لذیذ کھانوں کا اہتمام کیا جاتا ہے۔

اگر آپ بھی اس رمضان اپنے اہلِ خانہ کے لیے کچھ ذرا مختلف اور ذائقے سے بھرپور تیار کرنا چاہتے ہیں تو ڈرائی چکن چلی وِد چائنیز رائس بہترین انتخاب ہے۔

یہ ڈش نہ صرف بنانے میں نسبتاً آسان ہے بلکہ مہمانوں کی تواضع کے لیے بھی ایک عمدہ پیشکش ثابت ہوتی ہے جس کی آسان سی ترکیب آپ کی خدمت میں پیش ہے۔

درکار اجزاء:

مرغی۔ ڈیڑھ کلو

ہری مرچ (بڑی)۔ 12عدد

لہسن (پسا ہوا)۔ ایک کھانے کا چمچ

سرکہ۔ ایک کھانے کاچمچ

کالی مرچ۔ آدھا چائے کاچمچ

تیل۔ تین کھانے کے چمچ

سویا سوس۔ ایک کھانے کاچمچ

اجینو موتو۔ آدھا چائے کا چمچہ

نمک۔ حسب ذائقہ

چائنیز رائس بنانے کیلئے:

چاول۔ دو کپ

تیل۔ تھوڑا سا

گاجر، شملہ مرچ، ہری پیاز۔ حسبِ ضرورت

کالی مرچ۔ ایک چائے کا چمچ

چائنیز نمک۔ ڈیڑھ چائے کا چمچ

ترکیب:

سب سے پہلے گوشت کو ہڈی سے الگ کرکے چھوٹے چھوٹے ٹکڑوں میں کاٹ لیں اور انہیں ایک ساتھ رکھ کر بڑی چھری سے کچل لیں۔ پھر سرکہ اورسویا سوس لگا کر بیس منٹ کے لیے رکھ دیں۔ ساتھ ہی ہری مرچ کو بھی درمیان سے لمبے لمبے ٹکڑوں میں کاٹ لیں۔ ایک دیگچی میں تیل ڈال کر پسا ہوا لہسن، گوشت، کالی مرچ، نمک ڈال کر اچھی طرح فرائی کر لیں۔ جب یہ فرائی ہوجائے تو اوپر سے اجینو موتو چھڑک دیں۔

اب فرائی پین میں ایک چمچ تیل ڈال کر مرچوں کو ہلکا فرائی کر لیں، ان میں تھوڑا سرکہ، سویا سوس اور اجینو موتو ڈال دیں۔ پھر انہیں فرائی گوشت کے اوپر ڈال کر اچھی طرح مکس کریں۔ لیجیے مزیدار ڈرائی چکن چلی تیار ہے۔

چائنیز رائس بنانے کے لیے سب سے پہلے چاول کو مرغی کی یخنی میں تین کنی اُبال لیں، پھر اسے الگ رکھ دیں۔ اب تمام سبزیوں کو باریک کاٹ لیں۔ پھر ایک کڑاہی میں تھوڑا سا تیل، کٹی ہوئی سبزیاں اور چاول ڈال کر فرائی کریں۔ اسی دوران اس میں چائنیز نمک اور کالی مرچ ڈالیں۔ تیار ہونے پر چائنیز رائس کو چکن چلی کے ساتھ پیش کریں۔