روزے میں صحت مند رہنے کے طریقے

صحت بخش افطار کریں: رمضان کے مبارک دنوں اور راتوں میں دل جمعی اور خشوع و خضوع کے ساتھ عبادات کرنے کے لئے ضروری ہے کہ ہم خود کو صحت مند رکھیں۔ تین کھجور اور پانی کے ساتھ روزہ کھولنے سے آپ کے جسم کو فوری طور پر توانائی بھی حاصل ہوجاتی ہے اور پانی کی کمی بھی دور ہوجاتی ہے۔ 

اگر آپ چاہیں تو اس موقع پر ہلکا پھلکا سوپ بھی پی سکتے ہیں، اس سے بھی پانی کی کمی دور ہوسکتی ہے۔ کوشش کریں کہ افطار اور رات کے کھانے میں بھاری، مرغن تلی ہوئی چیزیں کم مقدار میں استعمال ہوں، نمکین اور شکر سے بھرپور ڈشیں کم کھائیں۔ 

مچھلی، چربی سے مبرا گوشت، ثابت اناج یا بھورے چاول اور پاستا کو ترجیح دیں، ہرے پتوں والی سبزیوں کو خوراک میں شامل کرنا نہ بھولیں۔ وٹامن سی اور وٹامن ڈی کی حامل غذائیں استعمال کریں تاکہ ان کی کمی نہ ہو۔ جلد بازی میں نہیں، آہستہ آہستہ اطمینان کے ساتھ چبا چبا کر کھائیں اور پلیٹ پر اپنے کھانے کی مقدار کو بھی نظر میں رکھیں تاکہ بعد میں بدہضمی نہ ہو اور وزن نہ بڑھے۔

سحری میں متنوع خوراک: رمضان سے پہلے کے ناشتے کی طرح سحور کو بھی اپنے دن کا سب سے اہم کھانا بنائیں۔ سحری میں غذائیت بخش خوراک مثلاً دلیہ، پنیر، دہی، لسی، پھلوں اور سبزیوں کو دسترخوان کی زینت بنائیں۔ 

بعض غذائیں جن کا گلائیکمک انڈیکس کم ہوتا ہے، جن میں جو، جوار، مختلف اناج، ثابت گندم سے تیار روٹی، حمس اور دہی شامل ہیں، سحری میں استعمال کریں کیونکہ یہ دن بھر جسم کو توانائی فراہم کرتی رہیں گی۔ افطار و سحری کے دوران چائے اور کافی کی جگہ لبن (چھاچھ) اور تازہ جوس پیئں تاکہ دن بھر جسم میں پانی کی کمی نہ ہو ۔

جسم میں پانی کم نہ ہونے دیں: روزے کی حالت میں جسم میں پانی کی کچھ مقدار کی کمی تو فطری ہے جس سے لوگوں میں سر ہلکا ہونے اور توجہ مرکوز کرنے میں دشواری ہوسکتی ہے لیکن اس کمی کو افطار اور سحور کے دوران زیادہ پانی اور مشروبات پی کر دور کیا جاسکتا ہے۔ 

تھوڑے تھوڑے وقفے سے پانی زیادہ پیئیں یا دودھ شکر کے بغیر سادی چائے پیئں جس میں آپ لیموں کے قتلے یا تازہ پودینہ کی پتیاں شامل کرسکتے ہیں جس سے جسمانی زہریلے مادے خارج کرنے اور ہاضمہ بہتر کرنے میں مدد ملے گی۔ 

اگر آپ باقاعدگی سے کافی یا جھاگ دار کاربونیٹڈ مشروبات پینے کے عادی رہے ہیں تو ان کی مقدار جہاں تک ممکن ہو، کم کردیں کیونکہ یہ مشربات پیشاب آور ہوتے ہیں اور ان سے جسم میں پانی کی مقدار کم ہوسکتی ہے ۔

ورزش میں اعتدال: روزے کی حالت میں چونکہ پانی پینے کا موقع نہیں ملتا اس سے قدرتی طور پر ہمیں کچھ تھکاوٹ اور سستی کا احساس ہوتا ہے اور عام دنوں کی طرح سرگرم رہنے کے بجائے غیرمتحرک رہنا پسند کرتے ہیں۔ تاہم اگر افطار اور سحور کے دوران آپ نے جسم کی پانی کی ضرورت اچھی طرح پوری کی ہے تو آپ اعتدال کے ساتھ ہلکی پھلکی ورزش بھی کرسکتے ہیں جس میں چہل قدمی بھی شامل ہے۔

اس قسم کی جسمانی سرگرمی سے تھکاوٹ دور ہوتی ہے، جسم کو توانائی ملتی ہے جس سے وہ کام کرنے کے قابل رہتا ہے اور وزن بھی کم ہوسکتا ہے۔ تاہم روزے کی حالت میں ورزش کرنے سے جسم میں پانی کی کمی ہوسکتی ہے جو خطرناک ہے اس لئے بہترین طریقہ تو یہ ہے کہ سحری سے کچھ پہلے یا افطار کے چند گھنٹوں کے بعد ورزش کی جائے۔

صحت بخش عادتیں اپنائیں: رمضان ہمیں یہ موقع فراہم کرتا ہے کہ ہم اپنی بری عادتیں مثلاً سگریٹ نوشی اور شکر ملے کاربونیٹڈ مشروبات بہت زیادہ پینا ترک کردیں۔ 

آپ اپنے نفس پر معمولی کنٹرول کرکے ان بری عادتوں سے نجات حاصل کرسکتے ہیں۔ یہ ایک ایسا موقع ہے جب ہم اچھی عادتیں مثلاً سبزیوں کا استعمال بڑھا کر، زیادہ پانی پی کر اور معتدل ورزش کرکے اپنی صحت بہتر کرسکتے ہیں۔