رمضان میں مشروبات

جیسا کہ ہم سب جانتے ہیں پچھلی مرتبہ کی طرح اس بار بھی رمضان گرمیوں کے مہینے میں آ رہے ہیں۔ اس لئے ہمیں اور بھی زیادہ احتیاط کی ضرورت ہے تاکہ ہم زیادہ سے زیادہ اپنے روزوں کو سہل بنا سکیں۔ گرمی کے موسم میں سب سے اہم مسئلہ پیاس کا ہے۔ 

آپ گھر میں کام کر رہی ہوں یا گھر سے باہر خریداری کے لئے جا رہی ہوں آپ کو ہر جگہ پیاس لگے گی تو کیوں نہ میں آپ کو ایسی چیز بتاؤں جس سے آپ اپنا ہر کام آسانی سے سرانجام دے سکیں گی اور آپ کا روزہ بھی اچھا گزرے اور آپ کو پیاس بھی نہ لگے۔

ملیٹھی پاؤڈر 2 چمچ، گلو کوز 2 چمچ، پودینہ25 سے 30 پتّے، تخم بالنگا ایک چمچ، ٹھنڈا پانی ڈیڑھ لیٹر۔

ان تمام چیزوں گرائنڈ کر کے ٹھنڈے پانی میں مکس کر کے پیئیں۔ اس سے آپ کو پیاس نہیں لگے گی۔

اسے آپ سحری میں پیئیں، بچّے بوڑھے عورتیں جوان لوگ اس پی سکتے ہیں۔ اس سے آپ کا روزہ بہت اچھا گزرے گا اور پیاس بھی نہیں لگے گی۔

اس کے علاوہ بہت سے لوگ یا عورتیں ایسی ہوتی ہیں جو بہت زیادہ سُستی اور کاہلی کا شکار ہوتی ہیں تھوڑی تھوڑی دیر میں تھک جاتی ہیں یا اُن کا بلڈپریشر کم ہو رہا ہوتا ہے تو اُن کو چاہئے کہ وہ سحری اور افطار میں املی اور آلو بخارے کا شربت پیئیں۔ اس سے سارا دن پیاس کی شدّت میں کمی رہے گی اور یہ شربت سارا دن آپ کو ٹھنڈا رکھے گا۔

نمکین لَسّی

دہی (ایک پاؤ)، نمک (آدھا چمچ)، پودینہ (10 پتّے)، برف (ایک کپ)۔

ان تمام چیزوں کو بلینڈ کر کے لسی بنا لیں۔ پھر اس میں آدھا چمچ بُھنا ہوا زیرہ پیس کر شامل کرکے پیئیں۔

کلونجی کرشمہ ساز بُوٹی ہے جس میں بے شمار بیماریوں سے نجات کی قوت ہے۔ جدید تحقیق کے مطابق یہ بات دُرست ہے کہ کلونجی میں ہر بیماری کا علاج ہے۔ کلونجی باریک کالے دانے وزن کم کرنے میں مدد دیتے ہیں، کلونجی کا تیل جوش دے کر نیم گرم سر پر لگانے سے نزلہ زکام اور سر درد دُور ہو جاتا ہے۔

کلونجی کھانے سے بدن کی خشکی دُور ہوتی ہے، فربہ خواتین کے لئے کلونجی کا استعمال بہت فائدے مند ہوتا ہے۔ غرض یہ کہ کلونجی میں موت کے علاوہ ہر بیماری سے شفا ہے۔

میں جو آپ کو ٹوٹکا بتا رہی ہوں وہ جسمانی دردوں اور جسمانی طاقت کے لئے بے انتہا مفید ہے۔

کلونجی (20 گرام)، میتھی (20 گرام)، سونٹھ (10 گرام)، ہلدی (10 گرام)، دارچینی (20 گرام)، اَلسی بُھنی ہوئی (20 گرام)، کالے تل بُھنے ہوئے (20 گرام)۔

ان تمام چیزوں کو پیس کر شیشے کے مرتبان میں رکھ دیں اور ہر کھانے کے بعد ایک چمچی پانی کے ہمراہ کھائیں۔