کوفتہ بریانی-Kofta Biryani Recipe

اجزاء: چاول 750 گرام اُبلے ہوئے، نمک حسب ذائقہ، کالا زیرہ آدھا چمچ، گرم مصالحہ ثابت ایک چمچ، تیز پتا ایک عدد، تیل یا گھی ایک چوتھائی کپ۔

کوفتے کے لیے: قیمہ آدھا کلو، خشخاش ڈیڑھ چائے کا چمچ پسی ہوئی، گرم مصالحہ ایک چائے کا چمچ، نمک ایک چائے کا چمچ، ادرک لہسن کا پیسٹ ڈیڑھ چائے کا چمچ، ملائی ایک کھانے کا چمچ، کھوپرا ایک چائے کا چمچ پسا ہوا، لال مرچ ایک چائے کا چمچ پسی ہوئی، چنے ایک کھانے کا چمچ بھنے ہوئے، پیاز ایک عدد پسی اور کچی ہوئی، بریڈ سلائس ایک عدد ایک چوتھائی کپ دودھ میں بھیگا ہوا، ہرا دھنیا 2 کھانے کے چمچ، ہری مرچ 2 عدد کٹی ہوئی۔

مصالحے کیلئے: تیل 3 چوتھائی کپ، ہری مرچ 6 عدد ثابت، ٹماٹر 2 عدد بلینڈ کیے ہوئے، زیرہ ایک چمچ، ادرک لہسن کا پیسٹ ڈیڑھ چمچ، گرم مصالحہ آدھا چمچ، لال مرچ 2 چمچ پسی ہوئی، نمک ایک چمچ، دھنیا 2 چمچ پسا ہوا، پیاز آدھا کپ تلی ہوئی۔

دہی کے مکسچر کیلئے: دہی ڈیڑھ کپ پھینٹی ہوئی، پیلا رنگ ایک چٹکی، کیوڑا ایک کھانے کا چمچ، ہری الائچی ایک چوتھائی چمچ پسی ہوئی، جائفل ایک چوتھائی چمچ پسی ہوئی، جاوتری ایک چوتھائی چمچ پسی ہوئی، ہرادھنیا اور پودینہ 2 چمچ کٹا ہوا، خشک آلو بخارے 8 عدد۔

ترکیب: کوفتے بنانے کیلئے: چوپر میں قیمہ، خشخاش، گرم مصالحہ، نمک، ادرک لہسن کا پیسٹ، ملائی، کھوپرا، لال مرچ، چنے، کچی پیاز، بریڈ سلائس، ہرا دھنیا اور ہری مرچ ڈال کر اچھی طرح گرائنڈ کریں۔ پھر ان میں ایک چوتھائی کپ پانی شامل کرکے کوفتے بنائیں اور الگ رکھیں۔

مصالحہ بنانے کے لیے: تیل گرم کرکے اس میں ہری مرچ، ٹماٹر، زیرہ، ادرک لہسن کا پیسٹ، گرم مصالحہ، لال مرچ، نمک، دھنیا اور پیاز ڈال کر بھون لیں۔ پھر اس میں پانی شامل کرکے کوفتے ڈالیں اور ہلکی آنچ پر پکنے دیں، یہاں تک کہ کوفتے گل جائیں اور گریوی گاڑھی ہو جائے۔

دہی کے مکسچر کیلئے: ایک پیالے میں دہی، پیلا رنگ، کیوڑا، ہری الائچی، جائفل اور جاوتری کو مکس کرکے مکسچر تیار کرلیں۔ اب چاولوں کو نمک، کالا زیرہ، تیز پتا اور گرم مصالحہ ڈال کر آدھا پکالیں۔ اب پین میں آدھے اُبلے چاول ڈالیں۔ اب ان پر کوفتے اور گریوی ڈال دیں۔ پھر ان پر دہی کا مکسچر، ہرا دھنیا، پودینہ اور خشک آلو بخارے ڈال دیں۔ پھر ان پر باقی بچے چاول، ایک چوتھائی کپ تیل یا گھی ڈال کر پندرہ منٹ کے لیے دم پر چھوڑ دیں۔