مرحوم شخص کی طرف سے فدیہ

سوال:مرحوم شخص پر کچھ روزے اور کچھ نمازیں لازم تھیں، وہ نہ تو روزوں کی قضا رکھ سکا اور نہ نمازیں ادا کرسکا، تو اب اس کے وارثوں کے لئے کیا حکم ہے کیا وہ ان روزوں اور نمازوں کا فدیہ ادا کریں؟

جواب:مذکورہ صورت میں دو باتیں قابل ذکر ہیں۔ آیا مرحوم نے فوت شدہ نمازوں اور فوت شدہ روزوں کے فدیہ ادا کرنے کی وصیت کی تھی یا نہیں؟ اگر اس نے مرنے سے پہلے فدیہ ادا کرنے کی وصیت کی تھی تو اس کے وارثوں پر لازم ہے کہ یہ فدیہ ادا کریں دیگر وصیت اس کے 1/3 مال میں نافذ ہوگی، اس سے زائد میں نہیں، البتہ اگر وارث رضامند ہو جائیں تو 1/3مال سے زائد میں بھی یہ وصیت نافذ کرسکتے ہیں۔ دوسری صورت یہ ہے کہ مرحوم نے اس سلسلے میں کوئی وصیت نہیں کی تھی تو ایسی صورت میں یہ وارثوں کی صوابدید پر منحصر ہوگا کہ وہ چاہیں تو ادا کردیں اور چاہیں ادا نہ کریں۔ البتہ بہتر یہی ہے کہ ادا کر دیا جائے۔ اس لئے کہ وہ اس کے چھوڑے ہوئے مال سے دنیا میں فائدہ اٹھا رہے ہیں تو اس احسان کے بدلے میں اگر وہ فدیہ ادا کردیں تو اس مرحوم کو بھی آخرت میں فائدہ ہوگا اور ان وارثوں کو بھی ثواب ملے گا۔ وارث اگر نابالغ ہوں اور وہ فدیہ نکالنے کے لئے کہہ بھی دیں تو بھی ان کے حصے سے فدیہ ادا کرنا جائز نہ ہوگا۔