بُھول کر کھا پی لینا

سوال: بھول کر کھا پی لیا اور اتنا کھایا کہ خوب اچھی طرح پیٹ بھر لیا تو کیا اس طرح روزہ ہو جائے گا؟

جواب: بھول کر کھا پی لینے سے، چاہے وہ خوب اچھی طرح پیٹ بھر کرکھا لے، اس کا روزہ ہو جائے گا۔

سوال: ایک شخص بھول کر کھا پی رہا تھا، ایک شخص نے اُسے کھاتے دیکھ کر بتا دیا کہ بھائی تمہارا تو روزہ تھا، تو یہ سُن کر اس نے کھانا چھوڑ دیا، تو کیا اس کا روزہ ہوگیا اور کیا اس کا بتلا دینا صحیح تھا؟

جواب: جی ہاں! ایسا آدمی جو صحت مند اور تندرست ہو اور روزہ کی حالت میں بھول کر کھائے پیئے تو اسے یاد دلا دینا چاہیے کہ یہ رمضان کا مہینہ ہے اور تمہارا روزہ ہے اور اس شخص کو بھی یہ سُن کر کھانا پینا چھوڑ دینا چاہیے۔ اس صورت میں اس کا روزہ ہو جائے گا۔ اور اگر بھول کر کھانے پینے والا شخص عُمر رسیدہ ہے یا بیمار اور کمزور ہے اور روزہ کی حالت میں بھول کر وہ کچھ کھا پی لے تو دُوسرا آدمی اسے یہ یاد بھی نہ دلائے کہ تمہارا روزہ ہے اور یہ رمضان کا مہینہ ہے۔ اس صورت میں بھی اس کا روزہ ہو جائے گا۔