روزہ داروں کی فضیلت

حضرت ابو ہریرہ رضی اللہ عنہ کا بیان ہے کہ جناب رسول اللہ صلی اللہ علیہ وسلم نے فرمایا: ’’اللہ تعالیٰ کا فرمان ہے۔ ابن آدم کا ہر عمل اس کے لیے ہے سوائے روزہ کے، کہ وہ میرے (اللہ تعالیٰ کے) لیے ہے اور میں ہی اس کا بدلہ (بذات خود) دوں گا۔ پس جب تم میں سے کسی کا روزہ ہو تو وہ گالم گلوچ اور شور و شغب نہ کرے۔ اگر کوئی اس کو گالی دے یا لڑائی جھگڑا کرے تو وہ کہہ دے کہ میں روزہ سےہوں۔ اس ذات کی قسم! جس کے قبضے میں محمد (صلی اللہ علیہ وسلم) کی جان ہے، روزہ دار کے مُنہ کی بُو اللہ کے نزدیک مشک کی خُوشبو سے بھی زیادہ اچھی ہے۔ روزہ دار کو دو خوشیاں میسر آتی ہیں، ایک افطار کے وقت کہ افطار سے خوش ہوتا ہے اور دُوسرے جب وہ اپنے رَبّ سے ملے گا تو اپنے روزہ کی وجہ سے خوش ہوگا۔‘‘ (صحیح بخاری، صحیح مسلم)۔

حضرت سلامہ بن قیصر حضرمی رضی اللہ عنہ، جناب رسول اللہ صلی اللہ علیہ وسلم کا یہ ارشاد نقل فرماتے ہیں: آپﷺ نے فرمایا: ’’جو شخص اللہ تعالیٰ کی رضا اور خُوشنودی حاصل کرنے کے لیے (کامل اخلاص کے ساتھ) ایک دن کا بھی روزہ رکھتا ہے تو اللہ تعالیٰ اس کو جہنم سے اتنا دُور کر دیتا ہے جتنا کہ کوئی کوّا اپنی پوری زندگی مسافت طے کرے۔‘‘ (المعجم الکبیر، شعب الایمان للبیہقی)۔ ایک دُوسری حدیث میں ہے، جناب رسول اللہ صلی اللہ علیہ وسلم فرماتے ہیں: ’’جس کسی شخص نے اللہ کے راستے میں ایک دن کا روزہ رکھا تو اللہ تعالیٰ اس روزہ دار کو ستّر سال کی مسافت کے برابر جہنم سے دُور کردےگا۔‘‘ (صحیح مسلم،، صحیح بخاری)