چکن تکہ-Chicken Tikka Recipe

اجزاء: مرغی کے چار بڑے ٹکڑے (کٹواتے وقت بتادیں کہ تکہ کے لئے چاہئیں) دہی، ایک کپ۔ کریم، 2کھانے کے چمچ۔ ادرک، ایک چائے کا چمچ۔ لہسن کا پیسٹ، ایک چائے کا چمچ۔ سرخ مرچ پائوڈر، ایک کھانے کا چمچ۔ لیموں کا رس، 2کھانے کے چمچ۔ نمک، حسب ضرورت۔ زیرہ، (کوٹ لیں) ایک چائے کا چمچ۔ اجوائن، ایک چائے کا چمچ۔ سفید مرچ، آدھا چائے کا چمچ۔

ترکیب: کسی بڑے پیالے میں مرغی کے چاروں بڑے ٹکڑوں کو ڈال دیں، پھر اس میں دہی ، کریم، لہسن کا پیسٹ، ادرک (پسا ہوا) ڈالیں، تمام چیزو ں کو اچھی طرح مکس کریں۔ پھر اس میں سرخ مرچ پائوڈر ڈالیں، وہ خواتین جو سرخ مرچ پائوڈر نہیں ڈالنا چاہتیں، انہیں چاہئے کہ وہ کٹی لال مرچ ڈال لیں، اس کے بعد لیموں کا رس ڈالیں، پھر اس میں حسب ضرورت نمک شامل کریں۔ کٹا ہوا زیرہ، اجوائن اور سفید مرچ ڈال کر تمام چیزوں کو دوبارہ اچھی طرح مرغی کے ٹکڑوں پر لگائیں۔ اس بات کا خیال رکھیں کہ سارے مسالے اچھی طرح مرغی کے ہر حصے پر لگ جائیں۔ پھر اسے کم ازکم 5گھنٹے کے لئے میرینیٹ کریں۔ اس کے بعد کسی بڑے فرائنگ پین میں تیل ڈالیں اور ایک ایک کرکے چاروں مرغی کے پیسز کو ہلکی آنچ میں تل لیں، اگر چاہیں تو اسے بار بی کیو کرلیں، سیخ میں مرغی کے ہر ٹکڑے کو لگائیں اور اسے دہکتے ہوئے کوئلوں پر رکھ دیں، اس کے اوپر تیل یا گھی لگاتے جائیں اور سائیڈز تبدیل کرتی جائیں ، جب چاروں طرف سے پک جائے تو اسے نکال لیں۔ پلیٹ میں پیاز، ٹماٹر اور کھیرا کاٹ کر سجادیں، ساتھ ہی تیار چکن تکہ رکھ کر سرو کریں۔ مہمانوں کے سامنے سرو کرتے وقت ہری چٹنی بھی رکھیں۔