رمضان المبارک

حضرت سلمان فارسی رضی اللہ عنہ کا بیان ہے کہ جناب رسول اللہ صلی اللہ علیہ وسلم نے شعبان کے آخر میں ہمارے سامنے خطبہ دیتے ہوئے ارشاد فرمایا: ’’لوگو! یقیناً عظمت و برکت والا مہینہ تمہارے سر پر آگیا ہے۔ اس مہینہ میں ایک رات ایسی ہے جو ہزار مہینوں سے بھی زیادہ افضل ہے۔ اللہ تعالیٰ نے اس مہینہ کے روزے فرض قرار دیئے ہیں اور اس کی راتوں کی نماز (نماز تراویح) کو نفل ٹھہرایا ہے۔ اس مہینہ میں جو شخص ایک اچھی عادت یا نفلی عبادت اور نیکی کے ذریعے اللہ تعالیٰ کا قرب حاصل کرنے کی کوشش کرے گا تو اللہ تعالیٰ کے ہاں اس کی وہ حیثیت ہوگی جو رمضان کے علاوہ دنوں میں ایک فرض ادا کرنے کی ہوتی ہے، اور جس نے اس ماہ میں ایک فریضہ ادا کیا اس نے گویا ستّر فرائض ادا کیے۔ یہ صبر کا مہینہ ہے اور صبر کا بدلہ جنت ہے۔ یہ مہینہ ایک دُوسرے کے ساتھ ہمدردی اور محبت کرنے کا مہینہ ہے۔ اس میں مومن کی روزی بڑھا دی جاتی ہے۔ جس نے کسی روزہ دار کو افطار کرایا تو یہ عمل اس کے گناہوں کی معافی اور دوزخ سے نجات دلانے کا ذریعہ بن جائے گا اور روزہ دار کے اَجر میں کمی کیے بغیر اس کے برابر افطار کرانے والے کو بھی اَجر و ثواب ملے گا۔‘‘ (راوی کا بیان ہے کہ) ہم نے عرض کیا: یارسول اللہ صلی اللہ علیہ وسلم! ہم میں سے ہر شخص تو اس کی استطاعت نہیں رکھتا کہ وہ کسی روزہ دار کو افطار کراسکے؟ تو جناب رسول اللہ صلی اللہ علیہ وسلم نے فرمایا: ’’اللہ تعالیٰ یہ (مذکورہ) ثواب اس شخص کو بھی عنایت فرما دے گا جو ایک گھونٹ دُودھ یا ایک کھجور یا ایک گھونٹ پانی پلا کر افطار کرائے گا اور جو شخص کسی روزہ دار کو مکمل آسودہ کرے گا تو اللہ تعالیٰ اس کو میرے حوض کوثر سے اس طرح سیراب کرے گا کہ پھر جنت میں داخل ہونے تک اسے پیاس محسوس نہیں ہوگی۔ یہ وہ مہینہ ہے جس کا پہلا حصہ رحمت کا ہے، درمیانی حصہ بخشش و مغفرت کا اور آخری حصہ دوزخ سے آزادی کا ہے۔ اور جو شخص اس مبارک ماہ میں اپنے ماتحت غلام (مزدور، ملازمین اور اہل و عیال اور ماتحت ملازمین) کے ساتھ تخفیف، سہولت اور آسانی کا معاملہ کرے گا تو اللہ تعالیٰ اس کی مغفرت کردے گا اور اسے جہنم کی آگ سے نجات دے گا۔‘‘ (صحیح ابن خزیمہ، حدیث: 1887، شعب الایمان للبیہقی حدیث: 3611)۔