فاقہ کشی میں مہمان نوازی

حضرت ابو ہریرہ رضی اللہ عنہ کا بیان ہے کہ ایک مرتبہ ایک صاحب خدمت نبوی صلی اللہ علیہ وسلم میں حاضر ہوئے، وہ فاقہ کا شکار تھے۔ انہوں نے اپنی فاقہ مستی کا ذکر آپ صلی اللہ علیہ وسلم سے کیا اور کھانے کے خواستگار ہوئے۔ آپ صلی اللہ علیہ وسلم نے اپنی ازواج مطہراتؓ کے یہاں اطلاع بھیجی۔ قاصد ایک ایک حرم محترم کے یہاں گیا اور واپس آ کر بتایا کہ حرم نبوت میں کسی کے یہاں بھی سوائے پانی کے کھانے پینے کی کوئی اور چیز نہیں۔ آپ صلی اللہ علیہ وسلم نے اپنے صحابہؓ سے خواہش کی کہ کوئی ان کی مہمان نوازی کرے۔ ایک صحابیؓ اپنے ساتھ لے گئے، گھر جا کر معلوم کیا تو بیوی نے بتایا کہ گھر میں صرف بچّوں کی ضرورت کے مطابق کھانے کا سامان ہے۔ اتنا بھی نہیں کہ ہم لوگوں (ماں باپ) کے لیے گنجائش نکل آئے۔ فرمایا: کچھ حرج نہیں، بچّوں کو کسی طرح سُلا دو۔ کھانا تیار کرکے کھانا لا کر رکھو تو چراغ درست کرنے کے بہانے چراغ بجھا دو۔ مہمان خیال کریں گے کہ ہم لوگ بھی کھانے میں اس کے ساتھ شریک ہیں، حالانکہ ہم لوگ کھانے میں ان کے ساتھ شریک نہ ہوں گے بلکہ محض دکھانے کے لیے ہاتھوں کو ایسے حرکت دیتے رہیں گے جیسے ہم بھی ان کے ساتھ کھانے میں شریک ہیں۔ چنانچہ اللہ تعالیٰ اور جناب رسول اللہ صلی اللہ علیہ وسلم کی خُوشنودی کے خواستگار اور شوہر کی اطاعت گزار بیوی نے ایسا ہی کیا۔ جناب رسول اللہ صلی اللہ علیہ وسلم کے مہمان نے سیر ہو کر کھایا۔ میزبان خود بھی بھوکے رہے اور ان کے بچّے بھی۔ اور مہمان پر بار خاطر بھی نہ ہونے دیا کہ وہ دُوسروں کو بھوکے رکھ کر خود آسودہ ہو رہے ہیں۔ صبح کو جب میزبان صحابی خدمت اقدس میں حاضر ہوئے تو آپ صلی اللہ علیہ وسلم نے ارشاد فرمایا: ’’اللہ تعالیٰ آج شب تم پر ہنسے اور تم سے بہت خوش ہوئے اور یہ آیت نازل فرمائی: کچھ لوگ ہیں جو خود فاقہ مستی سے دوچار ہونے کے باوجود اپنے اُوپر دُوسروں کو ترجیح دیتے ہیں اور جو شخص بخل سے بچا لیا گیا وہی کامیاب ہے۔‘‘ (صحیح بخاری، حدیث: 3798، صحیح مسلم۔ حدیث: 2054)