زوجین پرترکہ رَد کرنے کا شرعی حکم

مفتی منیب الرحمٰن

تفہیم المسائل

سوال: ایک شخص فوت ہوا، اُس کے والدین پہلے فوت ہوچکے تھے، اولاد بھی نہیں، کوئی بھائی بہن نہیں ، صرف ایک بیوہ ہے ، ترکے میں پانچ کنال دس مرلہ زمین ہے ، بحیثیت وارث یہ کسے ملے گی ؟ (محمد انصر سعیدی )

جواب: اصحابِ فرائض کے مقرر حصوں کے بعد جو ترکہ بچ جائے اور اسے لینے والا کوئی عصبہ بھی نہ ہوتو اسے ذوی الفروض پر ان کے حصوں کے مطابق لوٹانے کو اصطلاحِ شریعت میں ’’رَد ‘‘ کہتے ہیں۔

زوجین پر رَد نہیں ہوتا ، لیکن متاخرین علمائے احناف نے زوجین پر رَد کرنے کا فتویٰ دیا ہے :علامہ ابن عابدین شامی لکھتے ہیں: ترجمہ:’’ ’’القُنْیَۃ ‘‘میں فرمایا: اور ہمارے زمانے میں بیت المال کے فساد کی وجہ سے زوجین پر مال کے رَد کا فتویٰ دیاجائے گا اور ’’زیلعی ‘‘ میں ’’النھایۃ‘‘ سے ہے: زوجین میں سے کسی ایک کے حصے سے جو مال فاضل ہو ،وہ اُسی پر لوٹا دیا جائے گا اور اسی طرح رضاعی بیٹے اور بیٹی کی طرف پھیر دیا جائے گا اور ’’المستصفیٰ‘‘ میں ہے : آج فتویٰ زوجین پر مال لوٹانے کے بارے میں ہے اور یہی ہمارے متاخرین علماء کا قول ہے اور ’’الحدادی‘‘ نے کہا: آج فتویٰ زوجین پر مال لوٹانے کے بارے میں ہے اور مُحقق ’’احمد بن یحیٰ بن سعد التفتازانی‘‘ نے فرمایا: بہت سے مشایخ نے زوجین پر مال لوٹانے کا فتویٰ دیا ہے جبکہ ان دونوں کے سوا اقارب میں سے کوئی موجود نہ ہو ،اس لیے کہ اس زمانے میں امام وقت کا فساد اورحکام کے مظالم غالب ہیں‘‘ ۔ آگے چل کر لکھتے ہیں: ’’ اور ’’المُستصفیٰ ‘‘ میں ہے : آج فتویٰ زوجین پر مال رَد کرنے کے بارے میں جب بیت المال نہ ہونے کی وجہ سے مستحق نہ ہوں، کیونکہ ظالم لوگ اسے اپنے مصرف میں خرچ نہیں کرتے ،(ردالمحتار علیٰ الدرالمختار )‘‘۔ صورتِ مسئولہ میںجبکہ مُتوفّٰی شخص کے ورثاء میں عصبات اور ذوی الارحام میں سے بھی کوئی موجود نہیں اور ذوی الفروض میں صرف بیوہ ہے ،تومُتوفّٰی شخص کا کل ترکہ اُس کی بیوہ کو ملے گا۔