والد کی دکان سے بلا اجازت پیسے اٹھانا

مولانا سیّد سلیمان یوسف بنوری

آپ کے مسائل اور اُن کا حل

سوال: ہم چار بھائی ہیں، بڑا بھائی والد کے میڈیکل اسٹور پر ہوتا ہے ،میں تیسرے نمبر پر ہوں ،میں دس سال سے اس دکان میں کام کرتا ہوں، لیکن بڑا بھائی ہر چیز پر قابض ہے، وہ مجھے دس ہزار تنخواہ دیتا ہے، جس میں گزارا ناممکن ہے۔ شادی شدہ ہوں اور والد بھی حیات ہیں۔ اس صورت میں کیا میرے لیے دکان سے پیسے ان کے اجازت کے بغیر اپنی جیب میں ڈالنا جائز ہے، یعنی اپنے بڑے بھائی سے چوری کرنا جب کہ کتنی بار کہہ چکا ہوں کہ مجھے بھی برابر کاحصہ دیا کرو، لیکن وہ مجھے نہیں دیتے۔ اس بارے میں ازروئے شریعت کیا حکم ہے؟

جواب: بڑے بھائی آپ کی تنخواہ نہیں بڑھاتے ، تو کاروبار چونکہ والد کا ہے، اس لیے والد صاحب کے سامنے اپنی ضرورت کا تذکرہ کرکے ان سے تنخواہ میں اضافے کی بات کی جاسکتی ہے، لیکن اگر دونوں میں سے کسی کی اجازت نہ ہو تو آ پ کے لیے چوری چھپے دکان سے پیسے اٹھانا جائز نہیں ہوگا۔ باقی اخراجات پورے کرنے کے لیے کسی اور جگہ ملازمت کرنے کی اجازت ہوگی، کم تنخواہ پر بھائی کے ساتھ ملازمت کرنا لازم نہیں ہے۔