آلو مٹر-Aloo Matar

آلو مٹر کا سالن خصوصاً بچوں کو کھلانا ایک مشکل کام ہے اور کچھ لوگوں کو مٹر سالن میں چبانا اچھا نہیں لگتا۔ لیکن اگر یہی مٹر آپ کو ہری چٹنی کے تیکھے مصالحے کے ساتھ پکانے کا ہنر آجائے تو گھر والے بھی اس سبزی کو کھانے کے لیے خوب فرمائش کریں گے۔

اجزاء:مٹر ایک پاؤ، آلو آدھا کلو گول قتلے کٹے ہوئے، ہری مرچ کا پیسٹ آدھا کپ، دھنیا اور پودینہ حسبِ ضرورت، زیرہ1چمچ، کالی مرچ آدھا چمچ، لہسن اور ادرک کا پیسٹ 1 چمچ، آئل 4 چمچ، پیاز1کٹی ہوئی، ٹماٹر2کٹے ہوئے، لال مرچ پاؤڈر 1چمچ، دہی1کپ، نمک 2 چمچ۔

ترکیب:سب سے پہلے ہری مرچوں کا پیسٹ بنائیں اور اس میں ہرا دھنیا، پودینہ، نمک، زیرہ پاؤڈر، کالی مرچ، لال مرچ ڈال کر مکس کرلیں۔اب پیاز فرائی کریں اور زیرہ بھون لیں جب یہ لال ہونے لگے تو اس میں ہری مرچوں کا پیسٹ، ادرک لہسن کا پیسٹ، دہی اور ٹماٹر ڈال کر اچھی طرح گریوی کو پکائیں اور آدھا کپ پانی شامل کرلیں۔آلوؤں اور مٹر کو ہلکا سا فرائی کرلیں۔ جب گریوی تیار ہونے لگے تو اس میں آلو اور مٹر ڈال کر 2 سے 4 منٹ کیلئے دم پر رکھ دیں۔لیجیے مزیدار انڈین انداز میں آلو مٹر ہری چٹنی کے ذائقے میں تیار ہے۔ اب اس کو ہرے دھنیے اور لیموں کے ساتھ سروو کردیں.