نبی کریم ﷺ کے والدین کریمین جنتی ہیں

مفتی منیب الرحمٰن

تفہیم المسائل

سوال: کیا نبی کریم ﷺ کے والدین جنتی ہیں یا نہیں ،میرا ایمان ہے کہ وہ جنتی ہیں، لیکن لوگ ثبوت مانگتے ہیں۔(ظہور احمد ، ممبئی )

جواب: رسول اللہ ﷺ کے والدین کریمین بلکہ حضرت آدم علیہ السلام تک آپ ﷺ کے تمام آباء و اُمّہات مومن ہیں ، علماء نے اس کے اثبات کے لیے تین طریقے اختیار فرمائے:

اول: تمام حضرات، حضرت ابراہیم علیہ السلام کے دین پر تھے۔

دوم: یہ حضرات زمانہ ٔ فترت (یعنی اس دور کے لوگوں) میں سے تھے ،جن کے لیے کسی نبی کی بعثت نہیں ہوئی تھی اوروہ کسی حکم شرع کے مُکلّف نہیں تھے،وہ صرف دینِ فطرت یعنی توحید باری تعالیٰ کے مُکلّف تھے اور اہلِ فترت پر عذاب نہیں ہوتا ، اللہ تعالیٰ کا فرمان ہے: ترجمہ:’’ ہم اس وقت تک عذاب دینے والے نہیں ہیں ،حتّٰی کہ ہم رسول بھیج دیں، (بنی اسرائیل:15)‘‘۔اللہ تعالیٰ کا فرمان ہے :ترجمہ:’’ اے اہلِ کتاب ! بے شک تمہارے پاس ہمارا رسول آگیا، جو انقطاعِ رُسل کی مدت کے بعد تمہارے لیے (احکامِ شرعیہ) بیان کرتا ہے، تاکہ تم یہ نہ کہو کہ تمھارے پاس کوئی بشارت دینے والا اور ڈر سنانے والا نہیں آیا ،پس تمھارے پاس بشارت دینے والا اورڈرانے والا (اللہ کا پیغام پہنچانے والا اور اس کے عذاب سے ڈرانے والا)آچکاہے اوراللہ ہرچیز پر قادر ہے، (سورۂ مائدہ:19)‘‘۔شرعی اصطلاح میں دو نبیوں کے درمیان وہ زمانہ جس میں کوئی رسول نہیں آیا، اسے زمانۂ فترت کہتے ہیں ۔ترجمہ:’’ حضرت قتادہ ؓ ’’عَلٰی فَتْرَۃٍ مِّنَ الرُّسُلِ‘‘کی تفسیر میں بیان کرتے ہیں: حضرت عیسیٰ علیہ السلام اور سیدنا محمد ﷺ کے درمیان زمانۂ فترت پانچ سو ساٹھ سال ہے ، (تفسیر طبری:11618)‘‘۔

سوم:رسول اللہ ﷺ کے والدین کریمین کو اللہ تعالیٰ نے آپ ﷺ کی دعا سے دوبارہ زندگی عطا فرمائی اوروہ آپ پر ایمان لائے۔

علامہ ابوالقاسم عبدالرحمن بن عبداللہ السُہیلی مُتوفّٰی 581ھ لکھتے ہیں: ترجمہ:’’ حضرت عائشہ رضی اللہ عنہا بیا ن کرتی ہیں: رسول اللہ ﷺ نے اپنے رب سے اپنے والدین کو زندہ کرنے کا سوال کیا ،پس اللہ تعالیٰ نے آپ کے لیے انہیں زندہ کیا اور وہ دونوں آپ ﷺ پر ایمان لائے ،پھر اللہ تعالیٰ نے اُن پر موت طاری کردی۔اور اللہ ہر شے پر قادرہے اور اس کی رحمت وقدرت کسی چیز سے عاجز نہیں ہے اور نبی ﷺ اس کے اہل ہیں کہ وہ رب ذوالجلال آپ ﷺ کو جس وصف سے چاہے ،اپنے فضل سے خاص کرے اور اپنے کرم سے آپ کو جس نعمت سے چاہے ، نوازدے ،صَلَوَاتُ اللہِ عَلَیْہِ وَآلِہِ وَسَلّمَ(اَلرَّوْضُ الأَنف فِی شَرحِ السِّیْرَۃِ النَّبَوِیّۃ ،جلد2،ص:187)‘‘۔

امام اہلسنّت امام احمد رضاقادری ؒ لکھتے ہیں: ’’اہل فترت جنہیں انبیاء اللہ صلوات اللہ وسلامہ علیہم کی دعوت نہ پہنچی، تین قسمیں ہیں :اول موحد: جنہیں ہدایت ازلی نے اس عالمگیر اندھیرے میں بھی راہ توحید دکھائی جیسے:قس بن ساعدہ وزید بن عمروبن نفیل وعامر بن الظرب عدوانی وقیس بن عاصم تمیمی وصفوان بن ابی امیہ کنانی وزہیر بن ابی سلمٰی شاعر وغیرُہم رحمۃُ اللہ تعالٰی علیہم۔ دوم مشرک: اپنی جہالتوں ضلالتوں سے غیر خدا کو پوجنے لگے، جیسے کہ اکثر عرب۔ سوم غافل : براہ سادگی یا انہماک فی الدنیا انھیں اس مسئلے سے کوئی بحث ہی نہ ہوئی ،بہائم کے مثل زندگی کی، اعتقاد یات میں نظر سے غرض ہی نہ رکھی یا نظر وفکر کی مہلت نہ پائی۔بہت زنان (عورتوں) و چوپایوں واہل بوادی (صحراجنگل والوں) کی نسبت یہی مظنون (گمان)ہے، (فتاویٰ رضویہ ،جلد28، ص:438)‘‘۔

سورۂ شعراء ،آیت:219کی ایک تفسیر یہ ہے: نبی ﷺ ہمیشہ مومنین کی پشتوں میں منتقل ہوتے رہے اور اس آیت سے نبی ﷺ کے والدین کریمین کے ایمان پر استدلال کیاگیا ہے ، بہ کثرت اَجِلّہ اہلسنت کا یہی مذہب ہے ۔ (جاری ہے)