قرض سے سبکدوش کرنے کے مسائل

مولانا سیّد سلیمان یوسف بنوری

آپ کے مسائل اور اُن کا حل

سوال: میں قرضوں کے بارے میں پوچھنا چاہتاہوں۔ میرے کاروبار میں مجھے شدید نقصان ہوا تھا جو میرے کاروباری اور غیر کاروبار ی سب اثاثوں سے زیادہ تھا، لیکن یہ شکر ہے کہ میں نے کوئی فراڈ یا غبن نہیں کیا۔ لوگ بھی یہ حقیقت جانتے تھے اس لیے مجھے افسوس ضرور تھا لیکن شرمندگی نہیں تھی۔ جو لوگ سخت ڈیمانڈ کررہے تھے ،ان کے لیے تو میں نے اثاثے فروخت کیے اور کچھ سے مہلت لی اور بہتوں نے معاف بھی کردیے یا وہ خاموش رہے اور مطالبہ نہیں کیا۔ خدا کے کرم سے اور ہمت سے کام لے کر میں نے میدان نہیں چھوڑا اور نئے سرے سے کاروبار شروع کیا۔ مہربان رب نے پھر مہربانی شروع کردی ہے اور میں پھر اپنے پاؤں پر کھڑا ہونے لگا ہوں۔

اب جن لوگوں کےقرضے میں نے دے دیے ہیں، وہ تو دے دیے ہیں اور جن لوگوں نے مشکل وقت میں ڈیمانڈ نہیں کی ان کو دینے ہیں ،یہ تو میں جانتا ہوں، لیکن جن کی وجہ سے میں شک کا شکار ہوں کہ اب انہیں دوں یا نہ دوں، ان کے بارے میں آپ سے پوچھنا چاہتاہوں ۔کچھ نے کہا تھا کہ ہم نے معاف کردیا اور کچھ کو میں نے کہا آپ صبر کریں میں ان شاء اللہ ادا کروں گا۔ میں نے اپنا گھر بھی قرض کی وجہ سے بیچ دیا تھا اور کرائے کے مکان میں آگیا تھا۔ ایک پارٹی کو جب میں نے کہا کہ میں نقصان کی وجہ سے گھر بھی بیچ چکا ہوں تو اس نے کہا کہ اگر ایسا ہے تو ہمیں دینے کی ضرورت نہیں ،ہم نے چھوڑدیا۔ایک پارٹی جس کا اماؤنٹ بھی بڑا تھا، وہ اس شرط پرراضی ہوئے کہ اگر مجھے ریکوری نہ ہوئی تو وہ بھی نہیں مانگیں گے۔ اب ازروئے شریعت رہنمائی فرمائیں کہ مجھے ان سب کو دینا ہے یا نہیں؟

جواب: (۱) جن لوگوں نے اپنے قرضے معاف کیے اور آپ نے بھی معافی قبول کی یا کم ازکم ان کے سامنے انکار نہیں کیا ،ان کے قرضے تو معاف ہوگئے ہیں۔

(۲)جنہوں نے آپ کو معافی کی پیش کش کی اور کہا کہ ہم نے معاف کیا ،لیکن آپ نے جواب میں کہا کہ تھوڑا انتظار کریں میں ان شاء اللہ اداکروں گا،ایسے لوگوں کے قرض معاف نہیں ہوئے۔ پہلی صورت میں آپ قرضوں سے سبکدوش اس وجہ سے ہوئے کہ قرضہ معاف کرنے سے معاف ہوجاتا ہے اور دوسری صورت میں قرضہ اس وجہ سے باقی ہے کہ آپ نے معافی کی پیش کش مستر د کردی تھی۔

(۳)جن لوگوں نے اس شرط کے ساتھ معاف کیا تھا کہ اگر آپ کو وصولی نہ ہوتو انہوں نے معاف کیا ،ان کاقرضہ برقرار ہے ، وہ ادا کردیں۔

(۴)جنہوں نے اس شرط کے ساتھ معاف کیا تھا کہ واقعی اگر آپ اپنے گھر تک بیچ چکے ہیں تو انہوں نے معاف کیا ،ان کاقرضہ معاف ہوچکا ہے اور اب آپ اس سے بری الذمہ ہیں۔ اگر چہ یہاں بھی مشروط معافی کی پیش کش تھی، مگر چوں کہ آپ کے بیان کے مطابق آپ اپنا مکان قرضوں کی ادائیگی کے لیے بیچ چکے تھے ،اس لیے شرط ایسی تھی جو پہلے ہی وقوع پذیر ہوچکی تھی۔اصول یہ ہے کہ اگر معافی مشروط ہو اور شرط پہلے ہی سے رونما ہوچکی ہوتو معافی مؤثر رہتی ہے۔