علمی اور دینی خانوادے کے چشم و چراغ ’مولانا ولایت علی ؒ ‘

سید صفدر حسین

مولانا ولایت علی کا شمار تحریک آزادی اور مملکت خداداد پاکستان کی بنیاد رکھنے والے اکابرین کے ہراول دستے میں ہوتا ہے۔ مولانا ۱۷۹۰ء میں صوبہ بہار کے شہر عظیم آباد (پٹنہ) میں پیدا ہوئے۔ ان کا خاندان عرصہ دراز سے مذکورہ شہر کے مردم خیز محلہ صادق پور میں آباد تھا۔ مولانا ولایت علی کے آباؤ اجداد حضرت زبیر بن عبدالمطلب بن ہاشم جو رسول اللہ ﷺ کے بڑے چچا تھے، ان کی اولاد میں سےتھے۔ مولانا ولایت علی کے والد مولوی فتح علی نے ان کی تعلیم و تربیت پر خاص توجہ دی۔

انہوں نے علمی مراحل بڑی تیزی سے طے کئے۔ تعلیم مکمل کرنے کے بعد وہ لکھنؤ آئے اور یہاں ان کی ملاقات برصغیر کے انیسویں صدی کے عظیم مجاہد سید احمد شہیدؒ سے ہوئی اور انہوں نے سید صاحب کی بیعت کر لی اور ان کے ہمراہ بریلی چلے گئے۔

مولانا ولایت علی ، سید احمد شہیدؒ سے ارشاد اور تعلیم حاصل کرنے کے ساتھ حضرت شاہ ولی اللہ محدث دہلویؒ کے پوتے شاہ اسمعٰیل شہید سے بھی اکتسابِ فیض کرتے رہے اور شاہ صاحب موصوف کی جماعت مجاہدین میں شمولیت اختیار کرلی۔ ان کی ذاتی صلاحیتوں اور ذوق و شوق کو دیکھ کر شاہ اسمعٰیل شہیدؒ نے انہیں اپنی جماعت مجاہدین میں نائب مقرر کر دیا۔

آغاز میں مولانا ولایت علی تبلیغی اور اصلاحی سرگرمیوں میں مصروف رہے، لیکن بعد میں سکھوں اور انگریزوں کے خلاف جہاد میں حصہ لیا۔ رنجیت سنگھ نے پنجاب اور صوبہ سرحد (موجودہ پختونخواہ) کے غالب علاقوں پر قبضہ کرلیا اور سکھوں کی حکومت قائم کی۔ اس کے بعد اس کے جانشین کمزور ثابت ہوئے اور انگریزوں نے جنگوں میں انہیں شکست دی اور ان کے علاقوں پر قابض ہوگئے۔

مولانا ولایت علی نے اپنی جماعت کے ساتھ سکھوں اور انگریزوں سے جہاد کیا۔ سکھوں کی طاقت ختم کرنے کے بعد پنجاب اور سرحد (پختونخواہ) پر مکمل اقتدار حاصل کرنے میں انگریزوں کے لئے مجاہدین کی طاقت ایک بڑی رکاوٹ تھی، مسلمانوں نے مولانا ولایت علی کی قیادت میں کئی علاقوں پر قبضہ کر کے سید احمد شہیدؒ کی نیابت کرتے ہوئے اسلامی حکومت قائم کر دی تھی۔

مشہور معرکہ بالا کوٹ میں سید احمد شہید ؒ کی قیادت میں مجاہدین نے بشمول مولانا ولایت علی سکھوں سے بڑی بہادری کے ساتھ جہاد کیا، لیکن دفعتاً سید صاحب کے سینے پرگولی لگی اور وہ جام شہادت نوش فرما گئے۔

بعدازاں مولانا نے اپنے آبائی محلہ صادق پور میں مجاہدین کا مرکز قائم رکھا اور انگریزوں کے خلاف جہاد کا سلسلہ جاری رکھا۔ طویل اصلاحی، تبلیغی اور ہمہ جہت دینی خدمات انجام دینے کے بعد ۱۸۵۲ء میں مولانا ولایت علی کا انتقال ہو گیا۔(خدا رحمت کند ایں عاشقانِ پاک طینت را)