نیت کا اخلاص

سوال :نیت کا اخلاص ہونے سے کیا مراد ہے؟

جواب :حضرت عمر فاروق رضی اللہ عنہ کا بیان ہے کہ میں نے حضور اکرم صلی اللہ علیہ وآلہٖ وسلم کو یہ فرماتے ہوئے سنا کہ تمام اعمال کی قبولیت کا دارومدار نیت پر ہے۔ ہر شخص اپنی نیت کے مطابق ہی اجر و ثواب پاتا ہے تو جس شخص نے اللہ اور رسول صلی اللہ علیہ وسلم کی طرف ہجرت کی، اللہ تعالیٰ کی رضاجوئی اور اطاعت رسول صلی اللہ علیہ وآلہٖ وسلم کا دم بھرتے ہوئے تو اس کی ہجرت درحقیقت اللہ اور رسول صلی اللہ علیہ وسلم کی طرف ہوئی اور جس نے کسی دنیاوی غرض کیلئے یا کسی عورت سے نکاح کرنے کی خاطر ہجرت کی تو ایسے شخص کی ہجرت اسی غرض کیلئے ہو گی جس کی خاطر اس نے ہجرت کی ہے (وہ ہجرت کے ثواب سے بہرہ ور نہ ہو سکے گا) اس لئے کوئی بھی نیکی کرتے وقت یہ بہت ضروری ہے کہ وہ جو بھی نیک کام کرے وہ اللہ تعالیٰ کی خوشنودی اور رضامندی حاصل کرنے کیلئے کرے، اس کے علاوہ اس نیک کام سے اس کا کوئی دوسرا مقصد نہیں ہونا چاہئے۔