غصے سے بچنے کی تاکید

سوال : پیغمبر اسلام صلی اللہ علیہ وسلم سے کسی نے نصیحت کے لیے عرض کیا تو حضور صلی اللہ علیہ وسلم نے انہیں کیا نصیحت کی؟

جواب : ایک شخص حضور اکرم صلی اللہ علیہ وسلم کی خدمت اقدس میں حاضر ہوا۔ عرض کیا:یا رسول اللہ صلی اللہ علیہ وسلم! مجھے ایسی کوئی نصیحت کیجئے کہ جب تک میں جیوں اس پر عمل کرسکوں۔ بات مختصر ہو تاکہ میں اس کو بھول نہ جاؤں۔ آپ صلی اللہ علیہ وسلم نے ارشاد فرمایا: غصہ سے بچو۔ اس شخص نے اپنی بات دہرائی تو آپ صلی اللہ علیہ وسلم نے دوبارہ بھی یہی فرمایا: غصہ سے بچو۔ غصہ تمام برائیوں کی جڑ ہے۔ غصہ کا اظہار آدمی دوسروں پر کرتا ہے لیکن اس غصے کا نقصان آدمی کو خود بھگتنا پڑتا ہے۔ غصہ آدمی کی سوچ کو غلط رخ پر موڑ دیتا ہے۔ عام حالت میں آدمی مثبت انداز میں سوچتا ہے۔ وہ معتدل انداز میں رائے قائم کرتا ہے لیکن غصہ آتے ہی اس کی سوچ غیر معتدل ہوجاتی ہے۔ وہ حقیقت پسندانہ انداز میں سوچنے کے قابل نہیں رہتا۔ جو آدمی غصہ میں مبتلا ہوتا ہے وہ جذبات کے تحت ایسے فیصلے کرتا ہے جو جذبات سے خالی آدمی کبھی نہیں سوچے گا۔ غصے کا سب سے تباہ کن نتیجہ یہ ہے کہ غصہ ہمیشہ دوطرفہ ہوتا ہے۔ ایک شخص کے غصے کا اظہار دوسرے شخص کو بھی غضب ناک بنادیتا ہے۔ غصہ دوسرے شخص کو جوابی غصے میں مبتلا کردیتا ہے۔ اس طرح غصہ اپنے نتیجے کے اعتبار سے ردعمل کا سبب بنتا ہے۔ ایک شخص ایک عمل کرتا ہے اس کے بعد دوسرا شخص مشتعل ہوکر اسی ردعمل کا طریقہ اختیار کرلیتا ہے۔ یہ عمل اور ردّ عمل بار بار ہوتا رہتا ہے۔ اس لیے غصے کے بعد کسی آدمی کے لیے صحیح طرز عمل صرف ایک ہے۔ وہ ہے غصے کو یک طرفہ طور پر ختم کرنا۔ اسی کی طرف قرآن حکیم میں اس طرح اشارہ کیا گیا ہے: ’’جب ان کو غصہ آتا ہے تو وہ معاف کردیتے ہیں۔‘‘(37؛42) غصے کے نقصان سے بچنے کے لیے یک طرفہ صبر کے سوا کوئی دوسرا راستہ نہیں۔