دین میں نئی باتیں ایجاد کرنے کا وبال

حضرت ابو حازم رضی اللہ عنہٗ فرماتے ہیں کہ میں نے حضرت سہل رضی اللہ عنہٗ سے سنا، فرماتے تھے کہ میں نے نبی کریم صلی اللہ علیہ وسلم کو یہ ارشاد فرماتے ہوئے سنا کہ میں حوضِ کوثر پر تمہارا منتظر رہوں گا۔ جو حوضِ کوثر پر آجائے گا وہ اس سے (ضرور) پیئے گا اور جو اس سے پیئے گا کبھی بھی پیاسا نہ ہوگا، اور میرے پاس کچھ لوگ آئیں گے کہ میں انہیں جانتا ہوں گا اور وہ مجھے جانتے ہوں گے پھر ان لوگوں کو میرے پاس آنے سے روک دیا جائے گا۔ میں کہوں گا کہ یہ تو میرے (امتی) لوگ ہیں، تو مجھ سے کہا جائے گا کہ آپ صلی اللہ علیہ وسلم نہیں جانتے انہوں نے آپ صلی اللہ علیہ وسلم کے بعد کیا اعمال کئے۔ میں کہوں گا: دور ہو دور ہو وہ شخص، جس نے میرے بعد میرے دین کو بدل ڈالا۔

(صحیح مسلم شریف، باب: اثبات حوض نبینا صلی اللہ علیہ وسلم و صفاتہ )

(یہ وہ بدقسمت لوگ ہوں گے جنہوں نے آنحضرت صلی اللہ علیہ وسلم کے دین میں تحریف کرنے کی کوشش کی اور نئی نئی باتیں سنت کے نام سے دین میں ایجاد کیں اور دین کو رسومات اور نفسانی خواہشات کی تکمیل کا ذریعہ بنالیا اور ہر وہ کام جسے نبی کریم صلی اللہ علیہ وسلم اور صحابہ کرام رضوان اللہ علیہم اجمعین نے نہیں کیا، اسے دین کا جز بنا لیا۔ ایسے بدقسمت لوگ حوضِ کوثر پر پہنچنے کے باوجود محروم رہیں گے اور ساقیٔ کوثر صلی اللہ علیہ وسلم کے دستِ مبارک سے یہ مقدس پانی نہیں پی سکیں گے۔ اللہ تعالیٰ ہم سب کو اس سے محفوظ رکھے۔)