رمضان اور شیاطین

سوال :علماء سے یہ بات سنی ہے کہ رمضان المبارک میں شیاطین کو قید کردیا جاتا ہے، اس کے باوجود ماہ مبارک میں اہل اسلام گناہوں سے باز نہیں آتے۔ جب شیطان کو قید کردیا جاتا ہے تو پھر لوگ گناہ کیوں کرتے ہیں؟

جواب :صحیح احادیث سے یہ بات سامنے آتی ہے کہ رمضان کے بابرکت مہینے میں بڑے بڑے شیاطین جکڑ دیئے جاتے ہیں اور مہینے بھر تک وہ کھولے نہیں جاتے، اس کے باوجود لوگ گناہ کرتے ہیں۔ علماء نے اس کی کئی وجوہ بیان کی ہیں۔ ایک تو یہ ہے کہ احادیث میں بڑے بڑے اور سرکش شیاطین کو قید کئے جانے کا ذکر ہے۔ اس سے معلوم ہوتا ہے کہ کچھ شیاطین ایسے بھی ہیں جو اس مبارک مہینے میں بھی ابن آدم کو ورغلانے اور گمراہ کرنے کے درپے رہتے ہیں۔ دوسری وجہ یہ ہے کہ بعض لوگ سال بھر یا اس سے بھی زیادہ طویل مدت تک گناہوں کی کثرت کی وجہ سے گناہوں کے عادی ہوجاتے ہیں حتیٰ کہ ان کا نفس، نفس امارہ بن جاتا ہے جو انسانوں کو صرف برائی پر آمادہ کرتا ہے۔ جیسا کہ ترمذی کی حدیث میں جناب رسول اللہ صلی اللہ علیہ وسلم کا ارشاد گرامی ہے ’’ابن آدم سے جب کوئی گناہ سرزد ہوجاتا ہے تو اس کے دل پر ایک سیاہ نقطہ بن جاتا ہے اور اس طرح گناہوں کی کثرت کی وجہ سے پورا دل سیاہ ہوجاتا ہے حتیٰ کہ اس کے دل پر مہر لگا دی جاتی ہے۔‘‘ (ابو دائود)۔ دل جب سیاہ ہوجاتا ہے اور اس پر مہر لگا دی جاتی ہے تو پھر ہدایت حق کی طرف کسی بھی قسم کی رغبت و میلان پیدا نہیں ہوتا اور ایسا انسان ہمیشہ ہمیشہ کی بدبختی و شقاوت کا شکار ہوجاتا ہے۔ اللہ تعالیٰ سب کو اس بدترین صورت حال اور برے انجام سے محفوظ رکھے۔ آمین۔