روزہ کی فرضیت

سوال :روزہ کی فرضیت کا حکم کب نازل ہوا؟

جواب :ہجرت کے بعد دوسرے سال سنہ 2ھ میں ماہ رمضان کے روزے فرض کئے گئے۔ جناب رسول اللہ صلی اللہ علیہ وسلم اور صحابہ کرام رضوان اللہ علیہم اجمعین ماہ رمضان کے روزوں کی فرضیت سے قبل بھی مخصوص ایام جیسے یوم عاشورہ اور ایام بیض وغیرہ میں روزے رکھا کرتے تھے۔

سوال :روزہ کیوں فرض کیا گیا؟ روزہ رکھنے کی حکمت اور اس کا مقصد کیا ہے؟

جواب :اللہ تعالیٰ نے قرآن حکیم میں روزے کا حکم دیتے ہوئے ارشاد فرمایا ’’اے اہل ایمان تم پر روزے فرض کئے گئے جیسا کہ پہلے لوگوں پر فرض کئے گئے تھے، شاید کہ اس طرح تم متقی بن جائو۔‘‘ (البقرہ 183:) اس آیت مبارکہ سے واضح طور پر معلوم ہوا کہ روزہ رکھنے کا مقصد ’’حصول تقویٰ‘‘ ہے اور تقویٰ کے معنی ہیں ہر حال میں اللہ تعالیٰ سے ڈرنا اور نیک کام کرتے رہنا۔ امام ابن تیمیہؒ کا کہنا ہے کہ روزے کی حقیقت یہ ہے کہ اپنے آپ کو گناہوں سے دور رکھنے کی مشق کی جائے، تقویٰ کے حصول کیلئے روزہ دار کو نہ صرف کھانے پینے سے ایک مقررہ وقت تک دور رہنے کا حکم دیا گیا ہے بلکہ اسے ہر قسم کے گناہوں سے بھی دور رہنے کا حکم دیا گیا ہے۔ جناب رسول اللہ صلی اللہ علیہ وسلم کا ارشاد مبارک ہے ’’روزہ صرف کھانے پینے سے پرہیز کا نام نہیں بلکہ ہر قسم کے لغو، فضول اور غلط کاموں سے دور رہنے کا نام ہے۔‘‘ (صحیح ابن خزیمہ حدیث 1997:۔صحیح ابن حبان حدیث 3480:) روزہ دار روزے کی حالت میں اپنے تمام جسمانی اعضا کی حفاظت کرتا ہے اور اپنے آپ کو ہر قسم کے گناہوں سے بچاتا ہے، اپنی نگاہوں کو ہر قسم کی حرام اور ناجائز چیزوں کو دیکھنے سے دور رکھتا ہے، اپنے کانوں کو غلط باتیں سننے سے بچاتا ہے، اپنی زبان کو بھی اپنے کنٹرول میں رکھتا ہے، اپنے ہاتھ پائوں اور دوسرے اعضائے بدن کو صحیح طور پر استعمال کرتا ہے۔ حضور اکرم صلی اللہ علیہ وسلم کا ارشاد گرامی ہے۔ ’’تم میں سے کسی کا روزہ ہو تو اسے چاہیے کہ وہ گناہ اور جہالت کے کاموں سے دور رہے۔ اگر کوئی شخص اسے گالی دے یا لڑائی جھگڑا کرے تو اسے کہہ دے بھائی میں روزے سے ہوں۔‘‘ (صحیح بخاری)