کینسر کے علاج کی وجہ سے روزہ کا فدیہ ادا کرنا

آپ کے مسائل اور اُن کا حل

سوال: میری اہلیہ کو بریسٹ کینسر ہے، وہ آپریشن ہونے اور کیمو تھراپی کے بعد اب ہارمون تھراپی پر ہے، یعنی ہر روز اسے دوا کی ایک گولی لینی پڑتی ہے اور دوا کے ساتھ ڈاکٹر کے مطابق روزہ نہیں رکھ سکتی، کیا اس صورت میں وہ فدیہ دے سکتی ہے؟

جواب: اگر آپ کی اہلیہ کو مسلمان، ماہر، دین دار ڈاکٹر نے مذکورہ بیماری کی وجہ سے روزہ نہ رکھنے کا مشورہ دیا ہے تو ایسی صورت میں ان کے لیے روزہ نہ رکھنے کی اجازت ہے اور ان کے جتنے روزے قضا ہوں، ان کا حساب نوٹ کرلیں، اور جب وہ صحت یاب ہوجائیں تو اس کے بعد جس موسم میں انہیں سہولت ہو، ان روزوں کی قضا کرلیں، جب تک صحت کی توقع ہو، فدیہ دینا کافی نہیں ہوگا، صحت کے بعد قضا لازم ہوگی۔

البتہ اگر روزہ رکھنے کی طاقت نہ رہی اور آئندہ تاحیات صحت یابی کی امید بھی نہیں ہے، تو ایسی حالت میں زندگی میں روزہ کا فدیہ دینا درست ہوگا، تاہم فدیہ ادا کرنے کے بعد اگر موت سے پہلے روزہ رکھنے کی طاقت حاصل ہو جائے اور وقت بھی ملے تو ان روزوں کی قضا کرنا ضروری ہوگا، فدیہ باطل ہوجائے گا، اور صدقۂ نافلہ کا ثواب ملے گا اور ایک فدیہ کی مقدار ایک صدقۃ الفطر کی مقدار کے برابر ہے۔ (فتاویٰ شامی 2/ 74)