تین دن کے روزے

سوال : ہر ماہ تین دن کے روزے رکھنا کیسا ہے؟

جواب : ہر ماہ تین دن کے روزے رکھنا مستحب اور بہت زیادہ اجر و ثواب کا باعث ہے بلکہ اگر کوئی شخص ہر ماہ تین روزے رکھے تو وہ ایسا ہے جیسے اس نے ساری زندگی روزے رکھے ہوں۔ حدیث میں ہے ’’جس شخص نے ہر ماہ تین روزے رکھے اس نے گویا ساری زندگی روزے رکھے۔‘‘ (ابن ماجہ) ایک نیکی اللہ تعالیٰ کے یہاں دس نیکیوں کے برابر ہے۔ اب اگر کوئی شخص ہر مہینہ تین روزے رکھے تو وہ اجر و ثواب کے حساب سے تیس دن یعنی پورا مہینہ روزے رکھنے کے برابر ہے۔ اس طرح جو ہر ماہ پابندی سے تین روزے رکھے، اس کو ساری زندگی روزہ رکھنے کا ثواب اللہ تعالیٰ عطا فرماتا ہے۔ ترمذی شریف میں حضرت ابوذر رضی اللہ عنہ کی حدیث ہے۔ جناب رسول اللہ صلی اللہ علیہ وسلم نے فرمایا۔ ’’جو ہر مہینے تین روزے رکھے گویا اس نے سال بھر روزے رکھے۔‘‘