طویل الاوقات ممالک میں روزہ

سوال:۔ دنیا کے بعض ممالک ایسے بھی ہیں جہاں چھ ماہ کا دن اور چھ ماہ کی رات ہوتی ہے۔ وہاں روزہ رکھنے کے لئے کیا کیا جائے؟

جواب:۔ ایسے ممالک میں اوقات کے اندازہ سے روزہ رکھا جائے گا اور اوقات کے اندازہ کے لئے اس سے قریب کے ملک کو معیار ٹھہرایا جائے گا جہاں معمول کے مطابق دن رات ہوتے ہوں اور پنج وقتہ نمازیں اپنے وقت پر پڑھی جاتی ہوں۔ اس سلسلے میں ’’حدیث دجال‘‘ بنیاد کی حیثیت رکھتی ہے۔ جس میں وضاحت کی گئی ہے کہ جناب رسول اللہ صلی اللہ علیہ وسلم نے نماز کو اوقات کے اندازہ سے پڑھنے کا حکم دیا ہے۔ اس حدیث میں ہے:ہم (صحابہ) نے عرض کیا۔ آپ کا کیا خیال ہے جب ایک دن ایک سال کے برابر ہوگا تو کیا اس میں ہمارے لئے ایک دن کی نماز پڑھ لینا کافی ہوگا؟ آپ صلی اللہ علیہ وسلم نے فرمایا۔ ’’نہیں، بلکہ اندازہ سے نمازیں پڑھنی ہوں گی۔‘‘ (صحیح مسلم، ترمذی)۔ اسی پر قیاس کرتے ہوئے فقہاء نے کہا ہے کہ روزہ کا بھی یہی حکم ہوگا۔ چنانچہ علامہ ابن عابد بن شامی فرماتے ہیں:’’اسی طرح روزہ اور زکوٰۃ وغیرہ جن عبادات کا تعلق وقت سے ہے ان میں نماز ہی کی طرح وقت کا اندازہ لگایا جائے گا۔‘‘ (ردالمختار23/2:)