رمضان میں عورتوں کا حصہ

سوال:۔ رمضان میں عورتیں نیکی کے کاموں میں کس طرح بڑھ چڑھ کر حصہ لے سکتی ہیں؟

جواب:۔ ماہ رمضان میں عورتوں کے لئے بہت زیادہ نیکیاں کمانے کے مواقع کثرت سے ہوتے ہیں۔ وہ سارے گھر والوں کے لیے سحری اور افطاری کی تیاری میں مصروف رہتی ہیں۔ پنج وقتہ نمازوں کا اہتمام، تلاوت قرآن شریف میں مصروفیت، چھوٹے بچوں کو ان کے اسکولوں میں بھیجنے کی تیاری، بڑوں کو ان کے دفتروں میں بھیجنا۔ ان کاموں کے ساتھ ساتھ اگر وہ اس بات کا اہتمام کرلیں کہ ان کے قول و فعل سے کسی کو دُکھ نہ پہنچے، کسی کا دل نہ دُکھے، وہ کسی کی غیبت نہ کریں۔ اپنی زبان کی حفاظت کا بہت زیادہ اہتمام کریں۔ وہ اپنی اولاد کی صحیح اسلامی تربیت کریں اور اس بات کی بھرپور کوشش کریں کہ ان کے گھر اور خاندان کے علاوہ پورے محلے کی فضا اسلامی بن جائے۔ اگر اس ماہ مبارک میں اخلاص اور استقامت کے ساتھ خواتین محنت کرنا شروع کردیں اور اس مہینے میں گھر اور محلہ کا نظام درست ہوجائے تو اس کا اثر ان شاء اللہ سال کے باقی مہینوں پر بھی پڑے گا اور اس کا جو اجر و ثواب اللہ رب العزت کی طرف سے ملے گا وہ اس قدر ہوگا کہ جب وہ انہیں دیا جائے گا تو اس کو دیکھ کر وہ حیران رہ جائیں گی کہ اس قدر اجر و ثواب آخر کس چیز کا ہے؟