غم گساری کا مہینہ

حضرت ابوہریرہ رضی اللہ عنہ کا بیان ہے کہ ایک مرتبہ ایک صاحب حضورنبی کریم صلی اللہ علیہ وسلم کی خدمت اقدس میں حاضر ہوئے، وہ بھوکے تھے۔ آپ صلی اللہ علیہ وسلم سے اپنی فاقہ مستی کا ذکر کیا اور کھانے کے خواست گار ہوئے۔ آپ صلی اللہ علیہ وسلم نے اپنی ازواج مطہرات کے یہاں خبر بھیجی۔ قاصد ایک ایک کے یہاں گیا اور واپس آکر بتایا کہ حرم نبوت میں کسی کے یہاں سوائے پانی کے کھانے پینے کی کوئی اور چیز نہیں۔ آپ صلی اللہ علیہ وسلم نے اپنے صحابہ سے خواہش کی کہ کوئی ان کی مہمان نوازی کرے۔ ایک صحابی انہیں اپنے ساتھ لے گئے، گھر جاکر حالات معلوم کیے تو بیوی نے بتایا کہ گھر میں صرف بچوں کی ضرورت کے مطابق کھانے کا سامان ہے۔ اتنا بھی نہیں کہ ہم لوگوں کے لیے گنجائش نکل آئے۔ ان صحابی نے فرمایا: کچھ حرج نہیں۔ بچوں کو سلا دو۔ جب بچے سوجائیں تو کھانا تیار کرو۔ کھانا لاکر رکھو اور چراغ درست کرنے کے بہانہ سے چراغ بجھا دو۔ مہمان خیال کریں کہ ہم بھی کھانے میں شریک ہیں حالانکہ ہم لوگ کھانے میں شریک نہیں ہوں گے بس ویسے ہی ہاتھ چلاتے رہیں گے۔ اللہ تعالیٰ اور اس کے رسول صلی اللہ علیہ وسلم کی خوشنودی کے طلب گار اور شوہر کی اطاعت گزار بیوی نے ایسا ہی کیا۔ حضوراکرم صلی اللہ علیہ وسلم کے مہمان نے خوب سیر ہوکر کھایا۔ میزبان خود بھی بھوکے رہے اور ان کے بچے بھی۔ اور مہمان کو اس بات کا پتہ بھی نہ چلنے دیا کہ وہ دوسروں کو بھوکا رکھ کر خود آسودہ ہورہے ہیں۔ صبح کو جب میزبان صحابی حضور صلی اللہ علیہ وسلم کی خدمتِ اقدس میں حاضر ہوئے تو آپ صلی اللہ علیہ وسلم نے ارشاد فرمایا: ’’آج شب اللہ رب العزت تم سے بہت خوش ہوئے اور تم پر ہنستے رہے اور یہ آیت نازل فرمائی ’’کچھ لوگ ایسے ہیں جو خود فاقہ مستی سے دوچار ہونے کے باوجود دسروں کو اپنی ذات پر ترجیح دیتے ہیں اور جو شخص بخل سے بچالیا جائے وہی کامیاب ہے۔‘‘ (سورۂ حشر9 ، صحیح مسلم، صحیح بخاری)