افطار کا وقت

حضرت عمر رضی اللہ عنہ کا بیان ہے کہ جناب رسول اللہ صلی اللہ علیہ وسلم نے ارشاد فرمایا: جب رات آجائے، دن چلا جائے اور سورج غروب ہوجائے تو روزہ افطار کرلیا جائے۔ (صحیح بخاری: حدیث: 1954، صحیح مسلم: حدیث: 1100)

حضرت سہل بن سعد رضی اللہ عنہ کا بیان ہے کہ جناب رسول اللہ صلی اللہ علیہ وسلم نے ارشاد فرمایا: لوگ بھلائی پر قائم رہیں گے جب تک کہ افطار میں جلدی کریں گے۔ (صحیح بخاری: حدیث: 1957، صحیح مسلم: حدیث: 1098)حضرت ابوہریرہ رضی اللہ عنہ کا بیان ہے کہ جناب رسول اللہ صلی اللہ علیہ وسلم نے ارشاد فرمایا: اس وقت تک دین محفوظ اور غالب رہے گا جب تک لوگ افطار جلدی کریں گے، اس لئے کہ یہود و نصاریٰ اس میں تاخیر کرتے ہیں۔ (ابودائود: حدیث: 2353)

حضرت سہل بن سعد رضی اللہ عنہ کا بیان ہے کہ جناب رسول اللہ صلی اللہ علیہ وسلم نے فرمایا: میری امت اس وقت تک میرے طریقے پر قائم رہے گی جب تک وہ افطار کرنے کے لئے ستاروں کے نکلنے کا انتظار نہ کرے گی۔ (صحیح ابن حبان حدیث: 3510)