شفاعت و بخشش کی نوید ہے رمضان....

رضیہ جوہر

اُمّتِ محمّدیؐ کے لیے ماہِ رمضان ایک ایسا جامع،برکات و فضائل سے مزیّن اَن مول انعام ہے کہ جس میں خلوصِ دِل سے کی جانے والی عبادات اور توبہ استغفار کی بدولت رحیم و کریم پروردگار سے بندے کا تعلق مضبوط سے مظبوط ترہوجاتا ہے۔ اُس وحدہ لاشریک نے اس مبارک مہینے میں تین عشروں کا تحفہ عطا فرمایا ہے۔ پہلا عشرہ، رحمتوں کے نزول کا ہے، جب ہر مومن کے گھر نیکیوں کی فصلِ بہار اُتر آتی ہے۔ ہر آنگن میں عبادتوں کے پھول مہکنے اور درود و سلام کی کلیاں چٹخنے لگتی ہیں۔ مساجد، جذبۂ عبودیت سے سرشار نمازیوں سے آباد ہوجاتی ہیں۔ روزے داروں کا ہر سجدہ اور احساسِ ندامت سے بہتا ہر آنسو، بارگاہِ الہٰی میں قبولیت کا شرف پالیتا ہے۔

اس رحمٰن و رحیم کے کرم کی انتہا تو دیکھیں کہ رمضان المبارک میں کی جانے والی عبادات کا اجر انسانی توقع سے کہیں زیادہ ملتا ہے۔ یعنی ہر نفل کا ثواب، فرض کے برابر اور ہر فرض کا اجر ستّر گُنا۔ یہ ہی نہیں، رحمتوں کے نزول کے عشرے کے اختتام پر رمضان المبارک کو اپنا مہینہ قرار دینے والا رب ،فرشتوں کو حکم دیتا ہے کہ اُس کے روزے دار بندوں کو اُس کے کرم و عطا کی بارش سے نہلا کر، خیر و سلامتی کی منفرد پوشاک پہنا کر، باحفاظت مغفرت کے دوسرے عشرے میں داخل کردو۔ اور جب عبادتوں کے مہکتے پھولوں کی الوہی مہک سے رچی بسی یہ نیک رُوحیں، مغفرت کی سرحدوں تک پہنچ جاتی ہیں، تو اُن کے تن مَن کی دنیا ہی بدل جاتی ہے۔ روزے داروں کا پور پور عشقِ الٰہی میں ڈوبا ہوا ہوتا ہے۔

وہ اپنے رب کا قرب حاصل کرنے کی چاہ میں، اُس کی حمد و ثناء سے غافل نہیں ہوتےبلکہ خلقِ خدا کی خدمت میں مزیدپیش پیش رہتے ہیں، جب کہ رات کی تاریکی میں اپنے گناہوں پر نادم و شرم سار ہوکر رب کے حضور اشکوں کا نذرانہ بھی پیش کرتے ہیں، بخشش و مغفرت کے طلب گار ہوتے ہیں۔اور بلاشبہ پروردگار کی عطا، بندے کی طلب سے کئی گُنا زائد ہوتی ہے۔ اسی لیے وہ اپنے عاجز اور فرماں بردار بندوں کی توبہ قبول کرتا ہے اور جس کا دامن بخشش و نجات کے موتیوں سے بَھر دیا جائے، اُسے پھر کسی سود و زیاں کا کیاخوف ۔ وہ بڑے فخر اور اطمینان سے جہنم سے آزادی کے تیسرے عشرے میں داخل جاتا ہے۔ بالکل اُس طالب علم کی طرح ،جس نے امتحانی پرچے بہت اچھی طرح دیے ہوں اور اُسے اپنی کام یابی کا یقین بھی ہو۔

روزے کا حقیقی مقصد نفس کی تربیت و اصلاح اور تقویٰ و پرہیز گاری کا حصول ہے۔ جب مومن یہ اوصاف حاصل کر لیتا ہے، تو وہ کوئی عام شخص نہیں رہتا۔ جس طرح سونا، بھٹّی میں تَپ کر کندن بن جاتا ہے، وہ بھی اتنا ہی معتبر و معزز ہوجاتا ہے۔اب، جب کہ پہلا عشرہ ختم ہوچکا ہے اور دوسرے کا آغاز ہے، تو سچّے دِل سےتوبہ استغفار کریں، تاکہ اس بابرکت ماہِ صیام کے طفیل ہمارے کھوٹے نصیب بھی کھرے ہوسکیں۔اللہ پاک تمام مسلمانوں کو رمضان المبارک کی فضیلتیں اور برکتیں اُن کی اصل روح کے مطابق سمیٹنا نصیب کرے اور ہر ایک ہی کے خالی دامن کو عبادات کے ثمرات سے بَھر دے۔آمین