’فراغت کے ایام‘ رمضان المبارک کی بہترین تیاری

شاہین فہد، اسلام آباد

کورونا وائرس سے بچاؤ کے پیشِ نظر ہر ایک کی معمول کی زندگی ذرا نہیں، کچھ زیادہ ہی بدل گئی ہے۔بیش تر اہلِ خانہ کو ایک دوسرے کی رفاقت میسّر ہے اور سب مل جُل کر ایک دوسرے کے کاموں میں مددبھی کررہے ہیں۔ ایسے میں سب کو خاصا وقت مل رہا ہے اور عقل مند وہ ہے، جو اپنے وقت کی منظّم منصوبہ بندی کرکے اسے بہتر کاموں میں صرف کرے ،نہ کہ فضول گوئی میں یا بے مقصد ضایع کردے۔ آپ اپنا وقت کیسے گزار رہے ہیں؟ کسی پلاننگ سے یا یوں ہی بےمصرف…؟بہرحال، ہمارے پاس ایک بہترین پلان خصوصاً خواتین کے لیے موجود ہے، جس پر عمل پیرا ہوکر جلد بحال ہونے والی معمول کی زندگی میں بھی، جس میں ’’وقت نہیں ملتا‘‘ کا رونا ہی رہتا تھا، نظم و ضبط پیدا ہوجائے گا۔ سب سے پہلے تو تہجد کی نماز باقاعدگی سےپڑھنا شروع کردیں۔

پنج وقتہ نمازیں نمازِفجر،ظہر،عصر اور مغرب اوّل وقت میں ادا کریں۔البتہ نمازِعشاء بے شک ذرا ٹھہر کے پڑھیں، مگر اس کےبعد کسی قسم کی فضولیات میں مشغول نہ رہیں۔ہر نماز کے بعد ذکر اللہ ضرور کریں۔ گھریلو ذمّے داریاں خوش اسلوبی سے ادا کی جائیں۔کوشش کریں کہ ہر وقت باوضو رہیں۔ علاوہ ازیں، کوئی ایک وقت مقرر کرکے قرآنِ پاک باترجمہ پڑھیں۔ دینی کتب کا مطالعہ کریں یا پھر اسلامی لیکچرز سُنیں۔ والدین، گھر کے بزرگوں کے پاس بیٹھ کر ان کی دِل جوئی کریں ۔کوشش کریں کہ آپ کی ذات سےکسی کو کوئی تکلیف نہ پہنچے، اگر آپ کسی کی دِل شکنی کاباعث بنیں، تو فوراً معافی مانگ لیں کہ جُھک جانےہی میں عظمت ہے۔پورے دِن میں کوئی اچھی بات ضرور سیکھیں اور دوسروں کو بھی اس جانب راغب کریں۔ اللہ کے حضور توبہ استغفار کریں۔ چوں کہ چند ہی دِنوں بعد رحمتوں، برکتوں اور مغفرتوں کا مہینہ جلوہ گر ہونے والا ہے، تو گھر کے تمام ضروری کام ابھی سے نمٹالیں، تاکہ مہینہ بَھرسُکون سے عبادت کرسکیں۔

گھر، خصوصاً باورچی خانے کی اچھی طرح صفائی کرلیں۔ اسی طرح اشیاء خورونوش کی فہرست مرتب کر کے پہلے ہی سے منگوالی جائیں کہ ان دِنوں5 بجے کے بعد تمام دکانیں بند ہورہی ہیں۔اور اگر مالی وسائل اجازت دیں، تو ضرورت مند گھرانوں میںماہِ رمضان سے قبل راشن کے پیکٹس تقسیم کروادیں۔سیدنا سلمان فارسیؓسے روایت ہے کہ رسول اکرم ﷺ نے ماہ شعبان کے آخری دِن خطاب کیا اور فرمایا،’’اے لوگو!ایک عظیم اور مبارک ماہ تم پر سایہ فگن ہواچاہتا ہے، یہ وہ ماہ ہے جس میں ایک رات ، لیلتہ القد،ہے جو ہزار مہینوں سےافضل ہے، اللہ تعالیٰ نے اس ماہ کے روزے تم پر فرض کیے ہیں اور اس کی راتوں کاقیام تمہارے لیےنفل قرار دیا ہے۔جو اس ماہ میں اللہ تعالیٰ کی رضا کے لیےخیر کا کام یا کوئی نفل کام کرے، گویا اس نے ایک فرض ادا کیا۔ 3

سوائے رمضان کے، جو کوئی اس ماہ میں ایک فرض ادا کرے، تو وہ اس کے مثل ہے، جس نے 70فرائض ادا کیے۔ اے لوگو۱ یہ صبر کا مہینہ ہے اور صبر کا بدلہ جنّت ہے۔ یہ غم خواری و ہم دردی کا مہینہ ہے۔ اس ماہ میں رزق بڑھا یا جاتا ہے، جو اس ماہ میں کسی روز ہ دار کا روزہ افطار کروائے تو اس کے گناہوں کی مغفر ت ہو، نارِجہنم سے وہ رہا ہو اور اس کےلیے اتنا اجر ہو ،جتنا روزہ دار کا اور روزہ دار کے اجر میں کمی نہ ہو۔ ‘‘ صحابہ کرامؓ نے فرمایا کہ’’ اگر ہم میں سے کسی کے پاس اتنا نہ ہو کہ روزہ دار کو پیٹ بھر کھلا پلا سکے ؟‘‘توآپﷺ نے فرمایا،’’ اللہ یہ ثواب اس کو بھی دے گا،جو کسی روزہ دارکو لسّی کے ایک گھونٹ یا کھجور کے ایک دانے سے افطار کروائے۔ جو کوئی اس ماہ میں روزہ دار کو کچھ کھلائے یا پلائے اللہ عز ّو جل (یوم حشر) اُسے میرے حوض کوثرسے ایسا سیراب کرے گا کہ اس کے بعد اسے کبھی پیاس نہ لگے گی،یہاں تک کہ وہ جنّت میں داخل ہو جائے گا۔‘‘

تو بہنو! آپ بھی ماہِ رمضان کی تیاریوں میںگھریلو کام کاج اور سحر و افطارکے اہتمام سے کہیں زیادہ نیکیاں کمانے پر فوکس رکھیں ۔