عورتوں کی آواز

کتاب و سنت کی روشنی میں

سوال:عورتوں کی آواز کے متعلق کیا مسئلہ ہے؟ اگر ان کی آواز کوئی غیر محرم سن لے تو کیا وہ عورتیں گناہگار ہوں گی؟

جواب:عورتوں کا اپنے غیرمحرم مردوں سے بات چیت کرنے میں نرم و ملائم انداز اور حلاوت اور شیریں لہجہ اختیار کرنا شرعاً ممنوع ہے۔ ایک ارشاد ربانی کا مفہوم یہ ہے۔ اے عورتو! اگر تم واقعی اللہ سے ڈرنے والی ہو اور پرہیزگاری کی زندگی اختیار کرنا چاہتی ہو تو نامحرم مردوں سے بول چال میں نزاکت اور لطافت مت اختیار کرو اور دبی زبان میں باتیں نہ کیا کرو، اس سے ایسے شخص کے دل میں فاسد خیال پیدا ہونے لگتا ہے جس کے قلب میں واقعی خرابی اور برائی ہے۔ سو وہ طمع اور لالچ کرے گا اور کچھ توقع بھی کرے گا۔ لہٰذا ایسے موقع پر تکلیف اور اہتمام سے اپنے فطری انداز کو بدل کر گفتگو کرو اور قاعدے کے موافق بات کرو اور ایسے انداز سے بات کرو جس میں خشکی اور روکھا پن موجود ہو اور یہ اپنی عصمت و عفت اور عزت کی حفاظت اور اس کے طمع فاسد کو دور کرنے کا ایک بہترین طریقہ ہے۔ اوّل تو عورتوں کو غیرمردوں سے بات کرنا ہی نہیں چاہئے البتہ اگر شدید مجبوری میں کسی نامحرم مرد سے بات کرنی پڑ جائے کہ گفتگو کئے بغیر چارہ ہی نہیں ہے تو ایسے موقع پر عورتوں کا لب و لہجہ اور اندازِ گفتگو ایسا ہونا چاہئے کہ جس سے بات کرنے والے مرد کے دل میں یہ خیال تک نہ گزر سکے کہ اس عورت سے کوئی غلط قسم کی توقع بھی قائم کی جاسکتی ہے۔ عورت کی آواز بھی نامحرموں سے پوشیدہ ہی رکھنے کا حکم ہے۔ امام ابوحنیفہؒ کے نزدیک کسی غیرمحرم مرد کو چاہے وہ رشتے دار ہی کیوں نہ ہو، اس کو بھی آواز سنانا جائز نہیں ہے۔ حضرت عمرو بن العاص رضی اللہ عنہ کی روایت کے مطابق جناب رسول اللہ صلی اللہ علیہ وسلم نے عورتوں کو ان کے شوہر کی اجازت کے بغیر غیرمردوں سے کلام کرنے سے سختی کے ساتھ روکا ہے۔ (تفسیر مظہری 188)۔ ایک مرتبہ حضرت عمر فاروق رضی اللہ عنہ نے ایک شخص کو دیکھا کہ وہ سرراہ ایک عورت سے بات چیت کر رہا ہے تو آپ سخت ناراض ہوئے اور اس کے درّے لگوائے۔ اس شخص نے عرض کیا امیرالمومنین! یہ میری بیوی ہے، کوئی غیر عورت نہیں۔ اس پر آپ نے فرمایا۔ ’’ٹھیک ہے یہ تمہاری بیوی ہے لیکن ایسی جگہ آپس میں کیوں بات چیت کر رہے ہو جہاں شبہ پیدا ہوسکتا ہے۔ گھر میں جاکر آپس میں جو چاہے بات چیت کرو۔‘‘ (احیاء علوم الدین۔ 491)