بچوں کو مسجد میں لانا

کتاب و سنت کی روشنی میں

سوال:بچوں کو مسجد میں لانے کے متعلق اسلامی طرزِعمل کیا ہے؟ بچے مسجد میں آتے ہیں تو شرارتیں تو کرتے ہی ہیں، خود بھی نماز نہیں پڑھتے اور دوسرے لوگوں کی نماز میں بھی خلل ڈالتے ہیں جس کی وجہ سے بڑے اور بزرگ بچوں کو ڈانٹ بھی دیتے ہیں جس سے ناخوشگوار صورت حال پیدا ہو جاتی ہے۔ اس سلسلے میں آپ سے رہنمائی درکار ہے؟

جواب:حضور اکرم صلی اللہ علیہ وسلم نے سات سال کی عمر کے بچوں کو مسجد میں لانے کا حکم دیا ہے۔ ظاہر ہے کہ سات سال کے بچے بڑوں کی طرح تو نماز نہیں پڑھیں گے، کچھ نہ کچھ شرارتیں تو وہ کریں گے۔ احادیث میں یہ بھی آتا ہے کہ حضور نبی کریم صلی اللہ علیہ وسلم کی نواسی امیمہ، آپ صلی اللہ علیہ وسلم جب نماز ادا کرتے ہوئے سجدہ میں جاتے تو وہ آپ کی کمر پر چڑھ جاتیں اور جب تک وہ خود آپ کی کمر سے نہ اُتر جاتیں، آپ سجدہ سے سر نہ اٹھاتے۔ اس سے اندازہ لگایا جا سکتا ہے کہ حضور صلی اللہ علیہ وسلم کا بچوں کے ساتھ طرز ِعمل کیا تھا۔ چھوٹے بچوں کو ڈانٹ ڈپٹ کر مسجد سے بھگانا نہیں چاہئے بلکہ انہیں پیار، محبت اور شفقت سے سمجھانا چاہئے کہ مسجد اللہ تعالیٰ کا گھر ہے، یہاں ادب و احترام سے بیٹھنا چاہئے اور دیگر نمازیوں کو دیکھ کر ان کی طرح رکوع، سجدہ اور نماز کے باقی ارکان ادا کرنے چاہئیں۔ اگر انہیں ڈانٹ ڈپٹ کر بھگا دیا جائے گا تو انہیں آئندہ مسجد میں نہ آنے کا بہانہ مل جائے گا اور وہ آئندہ مسجد میں قدم بھی نہیں رکھیں گے جس کی ساری ذمہ داری ان لوگوں پر ہوگی جنہوں نے انہیں ڈانٹ ڈپٹ کر مسجد سے بھگا دیا تھا۔